مستونگ : پاکستانی پوج ءَ لوگ سر ءَ بیڑبرتگ، پنچ مردم زورانسری بیگواہ کتگ اَنت، مھلوک زھرشانی ءَ اِنت

مستونگ ءِ دمگ اسپلنجی ءَ پوجی لشکر کشی، پوج ءِ آبادیانی سر ءَ گشت، بے سبب ءَ دزگیری ءُ زورانسری آوار جنی ءِ ھلاپ زھرشانی کنگ بیتگ-

دمگی مردمانی رِد ءَ، ایف سی ءَ سے دکاندار ءُ دو دھکنکار آوار جتگ ءُ بیگواہ کتگ اَنت – آیانی تہ ءَ دو ءِ پجّار یونس ء بشام ءُ بلال ء شیر احمد ناماں چہ بیتگ اَنت زھرشانی کنوکاں بیگواھیں مردمانی یل کنائینگ لوٹ کتگ-

مردمانی مزنیں کچے ءَ ایف سی بُنجل نیمگ ءَ مارچ بندات کتگ-

زھرشانی کنوکانی گوشگ اِنت کہ ھمکروچ پاکستانی پوج لوگانی سر ءَ بیڑ جنت ءُ بلوچ دودمان ءَ لگتمال کنگ ءَ اِنت-

آئی ءَ گْوشتگ کہ مردماں بے سبب ءَ دلسیاہ کنگ ءُ ایف سی ءِ بُنجل بندیگجاہ کنت ءُ لَٹ ءُ کُٹانی نشانگ کنگ ھمکروچی جوڑ بیتگ، چریشی ءِ سبب ءَ اسپلنجی ءِ راج زھرشانی ءَ لاچار بیتگ- اگاں پوج ءَ وتی رویشگ مٹ نہ کت گُڑا زھرشانی دراچکش کنگ بیت-