سرھال: منی سنگت ءُ بلوچ ءِ زندمان
نبشتہ کار: شاھان بلوچ
دی بلوچستان پوسٹ
دسمبر ءِ ماہ اَت ، شال ءِ زمستانیں شپے اَت ، وھد یک ءُ نیم اَت ءُ من ءُ منی سنگت وتی تھنائیں کوٹی ءَ نشتگ اَت ایں۔ مئے کوٹی ءَ اُستاد میر ءِ سوت پِر اَت۔ منی سنگت ءَ را موبائل دیم ءَ اَت ءُ من ءَ “The wretched of the earth “ ءِ کتاب دیم ءَ ات ءُ من وانگ ءَ اَت آں۔ منی کش ءَ سْیاھیں چاھے ھم ایر اَت۔ ھمے کتاب ءِ وانگ ءِ ھَمراھی ءَ من ساھتے ءَ جیڑ اِت کہ بلوچ پرچا جنگ ءَ اَنت؟ بلوچ دَگانی سر ءَ پرچا ویل اَنت؟ پرچا بلوچ ءِ رھشون جَنگ ءُ کُشگ بنت ءُ تھاریں کوٹیانی مَیار کنگ بنت؟ بلوچ ءِ زندمان پرچا اے پَیم ءَ اِنت؟ ھمے ساھت جیڑگ ءِ ھمراھی ءَ من کتاب بند کُت، چاہ ءِ گُٹّے وارت ءُ پد ءَ من جیڑگ ءَ لگِت آں۔ جیڑگ جیڑگ ءَ گوں من واب کپت آں۔
(واب)
من واب گِنداں کہ یک پیریں زالے ءُ بلاھیں پٹّے، نا ھلکے نا بازارے ھچ کہ ھچ گواھی نہ دنت۔ ھمے پیریں زال وتی لٹّ ءَ گُت دیان اِنت ءُ زمین ءِ سْیاھیں ڈوکاں لگت دیان ءُ کوکار کنان اِنت کہ” اوو ساوڑ! تو کُجا ئے، بیا مارا بے تو وش نہ بیت ، مئے ھلک ءَ ابیتکی ءَ مان شانتگ۔ “اود ءَ داں دیر ءَ ھمے زال پِریات ءَ اَت۔ من ھیران اَت آں کہ اے پیر زال اِد ءَ چے کنگ ءَ اِنت؟ من وتی دِل ءَ را سِنگے پِر دات ءُ پیر زال ءِ کِرّ ءَ شُت آں ۔ منی گِندگ ءَ گوں پیریں زال ءَ گریوگ بندات کُت ءُ گُشت ئِے ”منی چُک ساوڑ تو کُجا بوتگ ئے؟ من ترا کُجا کُجا شوھاز اِتگ؟ تئی جُست من ھرچ ھلک ءُ میتگ کُتگ، گول اِتگ اَنت، من ھچ مُلّا ءُ میّا یلہ نہ داتگ۔ “
من اَجب ھیران اَت آں ءُ من ھمے پیریں زال ءَ را جُست کُت، ”اماں کُجام ساوڑ، چونیں ھلک ءُ میتَگ ءُ کُجام مُلاّ؟“ منی گَپّانی اِشکنگ ءَ پد پیریں زال ءَ زانت کہ اے ساوڑ نہ اِنت۔ زال ءَ پد ءَ وتی چَک تَرّینت ءُ گام جنگ ءَ لَگ اِت۔ من توار کُت اماں ”منی جُستانی پَسو؟ “زال ءَ من ءَ گُشت” منی چُک منی پَسّواں تو چے کن ئے، من زاناں کہ تو پہ من ھچ کُت نکن ئے“۔ پد ءَ ھمے زال ءَ گُشت کہ ”ساوڑ ءَ ھَشت سال بیت کہ بیگواہ اِنت، نہ ھالے نہ اھوالے، من پہ ھمائی ءِ شوھاز ءَ در اتکگ آں“۔ زال پد ءَ رھادگ بوت ءُ من ھما جاہ ءَ چو بُت ءَ اوشتاتَگ اَت آں داں پیریں زال چہ من اندیم بوت۔
اناگت ءَ منی سنگت ءَ من ءَ واب ءَ چہ پاد کُت ءُ گُشت ئِے”مردُمے دروازگ ءَ ٹُکّگ ءَ اِنت۔ اے شپ ءِ 4 بج اَت۔ من پاد اتک آں ءُ دروازگ پچ کُت، دروازگ ءِ پچ کنگ ءِ ھمراھی ءَ من دیست کہ لھتیں بے زانگیں مُردم اَنت، ایشانی دست ءَ وڑ وڑیں تُپنگ اَنت ءُ یک دِگہ مَردکے ھم گون اَت کہ آئی ءَ بلوچی پُچ گور ءَ اَت۔ ھمیشاں چہ یکے ءَ من ءَ جُست کُت ، ”یہ مادر چود دودا کون ہے؟ (دودا منی سنگت ءِ نام اَت) ۔ من گُڑا اے چیز ءَ سدّک بوت آں کہ بے زانگیں ناں بگندے زانگیں زورگیر ءِ مُردم انت ءُ اے ھم زانت اے پرچا اِ ءَ اتکگ انت۔ من پسّو دات ”سر جی یہاں دودا نام کا کوئی شخص نہیں ہے.“ منی ھمے گَپ ءَ گوں دودا اتک دروازگ ءِ دپ ءَ من ءَ گُشت ئِے ”ھاں جان چے بوتگ؟“ دودا ءِ آیگ ءَ پد ھمے بلوچی پوشاکیں مردک ءَ گُشت، ”یہی ہے کُس مادر دودا، کمرے میں چُپا ہوا تھا ۔ “ھمے ساھت ءَ دودا ایشاں کوٹی ءَ چہ کش اِت ءُ من ءَ یک ترندیں شھماتے جت ئِے ءُ گوں وتی ترندیں توار ءَ گُشت ئِے ، ”آئندہ کے لیے خیال رکھنا وگرنا تمارا بھی یہی حال بوگا“۔ دودا اے ناشراں بُرت ءُ بیگواہ کُت ءُ تھاریں کوٹی یے میار کُت۔
پد ءَ من ءَ ھما واب ءَ دیستگیں پیریں زال ءِ گپ یات اتک انت واکی من ھچ کُت نہ کُت۔ پہ دودا ءَ بس امینچو پشت کپت۔
#ReleaseDodaBaloch
نو دودا ءِ اکس وٹسپ ءُ انسٹاگرام ءَ مردُمانی اِسٹوری اَت اَنت۔ ٹویٹرا دودا ءِ نام ءِ ایشٹیگ جوڑ بوتگ اَت ءُ دودا بس اَکسے ءِ پیم ءَ کوم ءِ دیم ءَ ترَّگ ءَ اَت۔ من ءَ اولی رند ءَ سما بوت کہ پہ بلوچاں اے ایشٹیگ ءُ ٹویٹر نوکیں چیز نہ انت۔ اِد ءَ ھر کس ءَ ایشٹیگ جوڑ بوگی اِنت، ءُ! بس ایشٹیگے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-