شال : ھدہ بندیگجاہ سپرنٹنڈنٹ ءَ منّ اِتگ کہ بیبو بلوچ شپ ءِ تھاری ءَ پشین بندیگجاہ ءَ برتگ- ڈاکٹر صبیحہ بلوچ

بلوچ یکجھتی کمیٹی ءِ بُنجاھی راھشون صبیحہ بلوچ ءَ گْوشتگ کہ شال ھدہ بندیگجاہ سپرنٹنڈنٹ ءَ منّ اِتگ کہ بیبو بلوچ شپ ءِ تھاری ءَ پشین بندیگجاہ ءَ برتگ-

آئی ءَ گْوشتگ کہ اے کار ءِ میان ءَ ناں آئی ءِ کھول ءَ نانکہ وکیل ءِ رزمندی یا کہ ھیال داشتگ- وھدے کہ پشین بندیگجاہ ءَ چہ کنگ بیتگیں پدری رِد ءَ، بیبو بلوچ انگت اود ءَ نیاورتگ اِت، کہ اے گپ تچکی ءَ نشان کنت کہ آ زورانسری آوار جتگ-

آئی ءَ گْوشتگ اشی ءَ اَبید، ڈاکٹر ماہ رنگ بلوچ ءِ کھول ءُ کانودی نمائندگ ءَ ھم مئے ھچ سنگت ءَ ملگ ءِ موکل دیگ ءَ نہ اِنت کہ اش تُرسناک اِنت

زانگ بہ بیت کہ شال ءِ ھدہ بندیگجاہ ءَ چہ بلوچ یکجھتی کمیٹی ءِ سروک رکن ءُ کارکن بیبو بلوچ سی ٹی ڈی کارندھاں زورانسری درکتگ ءُ ناشناسیں جاھے ءَ برتگ، وھدے کہ ھمے میان ءَ سی ٹی ڈی ءِ کارندھانی نیمگ ءَ چہ بی وائی سی ءِ راھشون ڈاکٹر ماہ رنگ بلوچ ءُ گلزادی بلوچ سر ءَ ھم لَٹ ءُ کُٹ کنگ ءِ ھال اِنت-

زانگ بہ بیت کہ بیبو بلوچ تھری ایم پی او ( 3MPO) ءِ رِد ءَ یک ماھے ءَ چہ گیش ھدہ بندیگجاہ ءَ بندیگ کتگ- ءُ آئی ءِ زمانت ءِ دزبندی بلوچستان ھائی کورٹ نیمگ ءَ چہ رد کنگ بیتگ- ءُ نامی ئیں کارکن ڈاکٹر ماہ رنگ بلوچ، بیبگر بلوچ، گلزادی بلوچ ءُ شاہ جی صبغت اللہ ءَ ھوار دگہ راھشونانی ھمراھی ءَ بندیگ اَنت-

بلوچ یکجھتی کمیٹی ءِ پارٹی ءِ راھشونانی سر ءَ لٹ ءُ کُٹ ءُ بیبو بلوچ ءِ بندیگجاہ ءَ چہ زورانسری بیگواھی ءِ درگت ءَ چہ شنگ کتگیں درشان ءِ تہ ءَ گوشتگ کہ اے یک تھنائیں وئیلے نہ اِنت بلکیں ریاستی ناشرکاری ءِ تچکی ءَ منّانک اِنت- زالبولیں کارکنانی نشانگ کنگ ریاست ءِ اے پالیسی ءِ بھر اِنت چریشی ءِ مول ءُ مراد بلوچ گھگیری ءِ ایرموش کنگ ءُ ھک ءِ توار ءِ بے توار کنگ اِنت – ما ریاست ءُ اشی ءِ ادارھاں بیبو بلوچ ءِ سلامتی ءَ سرجمی ءَ گوں زمہ وار گوش ایں-