شال : بندیگیں ڈاکٹر ماہ رنگ بلوچ ءُ دگرانی سر ءَ لَٹ ءُ کُٹ، بیبو بلوچ ءَ چہ بندیگجاہ ءَ ناشناسیں جاھے ءَ برتگ

کاؤنٹر ٹیررزم ڈپارنمنٹ ءَ پولیس ءِ بندیگ بلوچ سیاسی کارکنانی سر ءَ لَٹ ءُ کُٹانی نشانگ کنگ ءَ پد بیگواہ کنگ جُھد کتگ-

شال ءِ ھدہ بندیگجاہ ءَ چہ بلوچ یکجھتی کمیٹی ءِ سروک رکن ءُ کارکن بیبو بلوچ سی ٹی ڈی کارندھاں زورانسری درکتگ ءُ ناشناسیں جاھے ءَ برتگ، وھدے کہ ھمے میان ءَ سی ٹی ڈی ءِ کارندھانی نیمگ ءَ چہ بی وائی سی ءِ راھشون ڈاکٹر ماہ رنگ بلوچ ءُ گلزادی بلوچ سر ءَ ھم لَٹ ءُ کُٹ کنگ ءِ ھال اِنت-

بلوچ یکجھتی کمیٹی ءَ ھدہ جیل ءَ بندیگیں زالبولیں رھشونانی سر ءَ لَٹ ءُ کُٹ ءِ پدری کنان ءَ آیانی سنگت کاؤنٹر ٹیررزم ڈپارٹمنٹ نیمگ ءَ چہ بدتریں لَٹ ءُ کُٹانی نشانگ کتگ، وھدے کہ اے میان ءَ بیبو بلوچ، کہ یک ماھے ءَ چہ ھدہ بندیگجاہ ءَ بند اِنت، گِران کتگ ءُ برتگ ءُ آیانی ھمراہ بے کساس نارواھیں رویشگ کتگ-

زانگ بہ بیت کہ بیبو بلوچ تھری ایم پی او ( 3MPO) ءِ رِد ءَ یک ماھے ءَ چہ گیش ھدہ بندیگجاہ ءَ بندیگ کتگ- ءُ آئی ءِ زمانت ءِ دزبندی بلوچستان ھائی کورٹ نیمگ ءَ چہ رد کنگ بیتگ- ءُ نامی ئیں کارکن ڈاکٹر ماہ رنگ بلوچ، بیبگر بلوچ، گلزادی بلوچ ءُ شاہ جی صبغت اللہ ءَ ھوار دگہ راھشونانی ھمراھی ءَ بندیگ اَنت-

بلوچ یکجھتی کمیٹی ءِ پارٹی ءِ راھشونانی سر ءَ لٹ ءُ کُٹ ءُ بیبو بلوچ ءِ بندیگجاہ ءَ چہ زورانسری بیگواھی ءِ درگت ءَ چہ شنگ کتگیں درشان ءِ تہ ءَ گوشتگ کہ اے یک تھنائیں وئیلے نہ اِنت بلکیں ریاستی ناشرکاری ءِ تچکی ءَ منّانک اِنت- زالبولیں کارکنانی نشانگ کنگ ریاست ءِ اے پالیسی ءِ بھر اِنت چریشی ءِ مول ءُ مراد بلوچ گھگیری ءِ ایرموش کنگ ءُ ھک ءِ توار ءِ بے توار کنگ اِنت – ما ریاست ءُ اشی ءِ ادارھاں بیبو بلوچ ءِ سلامتی ءَ سرجمی ءَ گوں زمہ وار گوش ایں-

بیبو بلوچ، ڈاکٹر ماہ رنگ بلوچ ءَ ھوار دگہ سنگتانی ھمراھی ءَ گوستگیں یک ماھے ءَ چہ تھری ایم پی او ءِ رِد ءَ شال ھدہ بندیگجاہ ءَ بندیگ اَنت- آمیدگس ءَ آیانی ارزبندی ءِ زمانت رد کنان ءَ کیس ھکومت بلوچستان سر ءَ راھداتگ، اود ءَ گوستگیں روچ ءَ ھکومت ءَ ڈاکٹر ماہ رنگ بلوچ ءُ بیبو بلوچ ءِ تھری ایم پی او ءِ رِد ءَ نزر بندی ءَ دگہ سی روچ داتگ-

ڈاکٹر ماہ رنگ بلوچ ءُ بیبو بلوچ بیست دو مارچ دوھزار بیست پنچ ءَ شال ءَ یک پُرایمنیں زھرشانی ءِ میان ءَ بلوچ یکجھتی کمیٹی ءِ دگہ راھشونانی ھمراھی ءَ دزگیر کتگ اَت – آیانی ھلاپ ءَ تھری ایم پی او ءِ رِد ءَ ایف آئی آر نکش کتگ، کہ پاکستان ءَ گیشتر سیاسی کارکنان ءَ بید جرم ءَ ٹرائل ءِ یک دراجیں مدتے ءَ تاں بندیگ کنگ واستا کارمرز کنگ بیت-

دومی نیمگ ءَ بلوچ یکجھتی کمیٹی ءَ بیبو بلوچ ءِ زوت دیم آرگ ءُ سیاسی بندیگانی گوم ءَ در انسانی رویشگ ءِ ھلاس کنگ لوٹ کتگ-

زانگ بہ بیت کہ کاؤنٹر ٹیررزم ڈپارنمنٹ بلوچستان ءَ پاکستانی پوج ءِ ” بی ٹولی ” زانگ بیت، کہ پیسر ءَ چہ بندیگ کتگیں مردماں دروگیں میڑاں کُشگ ءُ مردمانی آوار جنی ءِ بازیں وئیلاں ھوار اَنت-

بلوچستان ءِ سیاسی ءُ چاگردی گلاں ھوار میان استمانی ھکانی ادارہ ءُ راھشوناں ھکومت ءُ پوج ءُ آئی ءِ گامگیج ءِ ایر جنان ءَ زوت بلوچ سیاسی کارکنانی یل کنگ ءِ لوٹ کتگ-