تربت، ڈیرہ بگٹی : پاکستانی پوج ءِ دست ءَ نُھ مردم زورانسری بیگواہ

بلوچستان ءِ دمگ چہ کیچ ءُ ڈیرہ بگٹی ءَ پاکستانی پوج ءَ نُھ مردم آوار جتگ ءُ ناشناسیں جاھے ءَ برتگ اَنت-

گیشیں ھالانی رِد ءَ بلوچستان ءِ دمگ چہ تربت آپسر ءَ سیادی داروکیں سی ھپت سالی ئیں سیفا ء مولابخش گوستگیں شپ ءَ زورانسری آوار جنی ءِ نشانگ کتگ-

وئیل ءَ بیست اپریل دوھزار بیست پنچ ءِ شپ نُھ ءَ بیتگ- کھول ءُ چمّ گندانی رِد ءَ سیفا آئی ءِ لوگ نزیک ءَ چہ زورانسری گاڑی ءَ مان کتگ ناشناسیں جاھے ءَ برتگ-

اے مرد یک ڈرائیورے – آئی ءِ کھول ءَ بھتام جتگ کہ آ ملٹری انٹیلیجنس ءِ کارندھاں آوار جتگ –

آئی ءَ گْوشتگ کہ وئیل ءَ پد سیفا ھچ وڑیں ھال نیست-

کھول ءَ سیفا ءِ زوت یل کنائینگ لوٹ کتگ گوشتگ کہ اگاں اشی ءِ سر ءَ بھتام ھست گڑا آمیدگس بہ کن اِت، اے وڑ بیگواہ کنگ ناں تھنا انسانی ھکانی ھلاپ ورزی اِنت-

چہ ڈیرہ بگٹی ءَ ھالانی رِد ءَ سی ٹی ڈی ءَ گلّہ ءُ چنا کار ءُ بار کنوکیں تاجر دزگیر کتگ اَنت-

دمگی مردمانی رِد ءَ چہ آیاں بازیں زر ءِ لوٹ کتگ – ھما مردم کہ زر دیگ ءِ گُنجائیش بیتگ آ یل داتگ اَنت، بلے گریبیں مردم ءَ زر دیگ گنجائیش نہ بیتگ آ گپتگ ءُ بیگواہ کتگ اَنت-

آیانی پجّار گل محمد ء جمعہ بگٹی، گوڑو ء بخت علی بگٹی، مرید ء خدا بخش بگٹی، علی خان ء عمر بخش بگٹی، گولا ء لالھان بگٹی، مھندرا بگٹی ( دمگی ھندو تاجر) ، بھلا بگٹی ءُ جاوید ء عرض محمد بگٹی نام ءَ چہ بیتگ اَنت-