مزنیں کساسے ءَ سلاہ بندیں مردم ڈیرہ بگٹی ءَ اتکگ ءُ ناکہ بندی کتگ ءُ یک مردمے دزگیر اش کتگ۔
ھالانی رد ءَ بلوچستان ءِ ضلع ڈیرہ بگٹی ءَ سلاہ بندیں مردماں سوگاری ءُ گوپت ءِ دمگاں مزنیں کساسے ءَ سنگر جوڑ کتگ ءُ ڈیرہ بگٹی ءَ گوں بلوچستان ءِ دگہ دمگ ءُ سندھ ءَ ہمگرنچیں شھدگ بند کتگ انت ءُ ٹریفک بند کتگ ءُ چیکنگ بندات کتگ۔
اے میان ءَ سلاھبندیں مردم شھر ءِ تہ ءَ عادل خان کالونی ءَ شُتگ اَنت ءُ بازار ءِ گشت ءَ پد سرفراز بگٹی ءِ زاتی باڈی گارڈ دزگیر کتگ ءُ گوں وت برتگ ۔
گْڈی ھالانی رد ءَ شھر ءِ تہ ءَ مزنیں کساسے ءَ سلاہ بندیں مردمانی ھال ھست۔
زانگ بہ بیت کہ ڈیرہ بگٹی انوگیں صوبائی سر وزیر سرفراز بگٹی ءِ ھند انت، وھدیکہ بلوچستان ءِ سر وزیر ءِ کارگس ءَ انگت ءَ اے بابت ءَ ھچ وڑیں ھال ءُ اھوال نہ داتگ۔
بلوچستان ءَ آجوئی دوستیں سلاہ بندیں گل ہر روچ جتا جتائیں دمگاں داکل بنت ءُ وتی چیک پوسٹ جوڑ کن انت ءُ ہمے وھد ءَ کوئٹہ ءُ کراچی ءَ ہوار بلوچستان ءَ گوں ایران ءُ اوگانستان ءَ ہمگرنچیں مزنیں شاہراہانی سرا گاڑیانی چیک کن انت۔
ھمے وڑ ءَ گوستگیں شپ ءِ دیراں بلوچستان ءِ ضلع کیچ ءِ ھوشاپ ءُ تربت ءِ میان ءَ دمگ ءَ سلاھبنداں ناکہ بندی کتگ ءُ بولان ءُ بیلہ ءِ کش ءُ گوراں ھم سلاہ بندیں مردمانی ھست بوھگ ءُ روگ ءُ آھگ ءُ ناکہ بندی ءِ ھال رس اِتگ۔
دومی نیمگ ءَ کیچ ءَ سلاھبنداں شاہ راہ ءِ سر ءَ روڈ بلاک ایر کتگ ءُ گاڑیانی چیک کنگ بندات کتگ ۔ آپریشن ءِ وھد ءَ آہاں ہوشاپ لیویز پولیس اسٹیشن ءِ سرا قبضہ کتگ ءُ اودا سرکاری سلاہ دست کپتگ انت۔
بلوچستان ءَ اے وڑیں وئیلانی زمہ واری باز براں بلوچ آجوئی ءِ سلاھ بندیں گلانی نیمگ ءَ زورگ بنت، البت انگت ھچ گل ءَ اے وئیلانی زمہ واری نہ زرتگ۔