نسیر آباد: سلاہ بنداں بازیں ساھاتاں ناکہ بندی، پولیس ءِ سر ءَ اُرش

بلوچستان ءِ دمگ نسیر آباد ءَ نیشنل ھائی وے ءِ سر ءَ بازیں ساھتاں ناکہ بندی، پولیس ءِ سر ءَ اُرش کتگ-

گوستگیں شپ ءَ نسیر آباد ءِ دمگ نوتل ءَ نیشنل ھائی وے دو کلاک ءَ چہ گیش بند کنگ بیتگ ءُ ہائی وے ءِ سر ءَ سنیپ چیکنگ برجاہ دارگ بیتگ۔

دومی نیمگ ءَ سلاہ بندیں مردماں پولیس ءِ گاڑی ءِ سر ءَ اُرش کتگ کہ آ ھمے جاہ ءَ آیگی بیتگ انت۔

پولیس ءَ اے وئیل ءِ پدرائی کتگ ءُ گشتگ کہ عزیز بلو نوتل پولیس اسٹیشن ءِ سیمسر ءَ نیشنل ہائی وے ءِ سر ءَ جمال بگٹی لارو ءِ نزیک ءَ نیشنل ہائی وے گشت پولیس ءِ سر ءَ سلاہ بندیں مردماں تیر گواری کتگ۔ تیرگواری ءِ آسر ءَ ھچ وڑیں تاوان ءِ ھال نہ بیتگ بلے ہائی وے پولیس ءِ گاڑی ءَ را کمے تاوان رس اتگ۔

چمدیستگیں مردمانی رد ءَ ناکہ بندی کنوکیں مردم بلوچ آجوئی ءِ جھدکار بوتگ اَنت کہ آھانی سر ءَ بلوچستان ءِ پرچم بوتگ اَنت وھدے کہ اسنیپ چیکنگ ءِ وھد ءَ مساپرانی ھچ سامان برگ نہ بیتگ انت۔

اے درگت ءَ تاں انوگ ءَ ھچ وڑیں گل ءِ نیمگ ءَ ھچ اھوال دیم نہ یتکگ، بلے بلوچستان ءِ جتاجتائیں دمگاں بلوچ سلاھبندیں گل اے وڑیں کارانی زمہ واریاں زورگ ءَ انت۔

گوستگیں ماہ ءِ 27 مارچ ءَ بلوچ راجی آجوئی سنگر ءَ اورمارہ ءَ نیشنل ہائی وے ءِ سر ءَ چیک پوسٹ ءِ نزیک ءَ راہ بستگ ءُ شش مردمانی پجار کنگ ءَ پد شش مردم کشتگ انت۔ اے گل ءِ رد ءَ اے مردماں پاکستانی انٹیلی جنس ادارگاں گوں سیادی بیتگ-

ھمے سال ءِ فروری ءَ بارکھان خان ءَ شھدگ ءِ بندگ ءِ وھد ءَ 7 مردم ءِ پجار کنگ ءَ پد کشگ بیتگ ات انت۔

اے کارروائی ءِ زمہ واری بلوچ لبریشن آرمی ءَ کبول کتگ ات۔ جارکش جیند بلوچ ءَ گشتگ کہ سرماچارانی انٹیلی جنس ونگ ’’زراب‘‘ ءِ رازداری ءِ رد ءَ بارکھان ءَ ٹارگٹڈ آپریشن کتگ ءُ دژمن ءِ 7 ھال رسانی کنوک پجار کنگ ءَ پد دزگیر کتگ انت۔ دژمن ءِ گْوشگ بوتگیں رازداریں کارندہاں شال ءَ ھوار بلوچستان ءِ دگہ دمگاں جاسوسی ءُ بلوچ نسل کشی ءِ زھرناکیں جرم سابت بیتگ ۔ آ چہ وتی سرجمیں پجار ءَ پد کُشگ بوتگ اَنت۔