لکپاس : بی این پی ءِ نندانک ءَ ھواریں راھشون چُک ءِ لاش دزکپتگ

چہ ھُزدار ءَ یک ورنایے لاش دزکپتگ کہ لَٹ ءُ کُٹ ءَ پد کُشتگ ءُ چگل داتگ-

بلوچستان ءِ دمگ چہ ھُزدار ءَ دزکپتگیں ھالانی رِد ءَ چہ نال ءِ دمگ ءَ انتزامیہ ءَ یک ورنایے ءِ لاش دزکپتگ، کہ آ دزگپتگ نادُراھجاہ ءَ برتگ اود ءَ لاش ءِ پجّار فاروق احمد نام ءَ چہ بیتگ-

بی این پی مینگل رِد ءَ مروچی ھُزدار ءَ کُشگ ءَ پد دور داتگیں بی این پی ھُزدار ءِ نائب صدر نور احمد مینگل ءِ ورنائیں بچ ئیگ اِنت کہ چاردہ اپرل ءَ بیگواہ کتگ مروچی آئی ءِ ٹپ ءُ ٹوریں لاش دور داتگ-

بی این پی مینگل ءَ گْوشتگ کہ فاروق احمد ء پت نور احمد مینگل پارٹی دمگی نائب صدر اِنت ءُ گوستگیں بازیں روچ ءَ بلوچ یکجھتی کمیٹی ءِ راھشونانی دزگیری ھلاپ ءَ لکپاس نزیک ءَ نندانک ءَ ھوار بیتگ-

بی این پی ءَ پارٹی راھشون چُک ءِ کوش ایر جتگ-

زانگ بہ بیت کہ مروچی بلوچستان ءِ دمگ چہ پسنی ءَ یک ھپدہ سالی ئیں بیگواہ کنگ بیتگیں ورنایے لاش دزکپتگ، آئی ءِ پجّار پسنی ءِ جھمنند نظام ء محمود نام ءَ چہ بیتگ وھدے کہ دگہ یک لاشے کیچ ءِ تھسیل چہ بلیدہ ءَ دزکپتگ-

ھالانی رِد ءَ پسنی ءِ جھمنند نظام ء محمود ھمے ماہ دوازدہ اپریل ءَ چہ ببر شور ءَ پاکستانی چیریں ادارھانی کارندھاں آوار جتگ ءُ ناشناسیں جاھے ءَ برتگ اَت چریشی ءَ پد آ دیم ءَ آرگ نہ بیتگ-

نظام ء محمود ءِ زورانسری آوار جنی ءِ پدری ھما وھد ءَ بلوچ یکجھتی کمیٹی ءَ کتگ اَنت وھدے کہ گل ءَ آئی ءِ یل کنائینگ لوٹ ھم کتگ اَت بلے مروچی چار روچ ءَ پد آئی ءِ لاش دزکپتگ-

ھمے وڑ بلوچستان ءَ لاشانی دزکپگ ءِ درچ یکرندے پد ءَ گوں تُرندی ءَ برجاہ ءَ اِنت وھدے کہ اے درگت ءَ بلوچستان ءِ جتاجتائیں دمگاں چہ بازیں لاشے دزکپتگ کہ آیانی پجّار درگت ءَ ھچ وڑیں ھال دیم ءَ نیتکگ-

ھمے وڑ گوستگیں روچ ءَ چہ ھب چوکی ءَ دو مردم ءِ لاش دزکپتگ اَنت آیانی پجّار انگت نہ بیتگ-