مستونگ : بی این پی ءَ لک پاس سر ءَ برجاھیں نندانک ھلاسی ءِ جار جتگ

بلوچستان ءِ دمگ مستونگ ءَ بلوچستان نیشنل پارٹی ءِ سروک سردار اختر جان مینگل ءَ لک پاس سر ءَ گوستگیں بیست روچ ءَ چہ برجاھیں نندانک ءِ ھلاس کنگ جار جتگ-

اے جار آئی ءَ مستونگ ءَ یک پریس کانفرنسے ءَ چہ تران کنان ءَ گوشتگ-

سردار اختر مینگل ءَ گْوشتگ کہ راج ءَ دیمپانی اڑ ءُ جنجال چارتگ ءُ نندانک ھلاس کنگ ءِ پیسلہ کتگ-

آئی ءَ گْوشتگ کہ نندانک ھلاس نزوری سبب نہ اِنت بلکیں سیاسی پالسیانی بھر اِنت، ءُ مئے زھرشانی نو دگہ دروشمے ءَ بندات بیت-

بی این پی ءِ سروک ءَ دیمتر ءَ گْوشتگ کہ آل پارٹیز کانفرنس ءَ جتاجتائیں سیاسی پارٹیاں نندانک ھلاس کنگ شور داتگ چریشی ءَ دلگوش کنگ ءَ پد پیسلہ کتگ-

اختر مینگل ءَ اے گپ اِھد کتگ کہ بی این پی وتی جمھوری لوٹانی منّگ ءَ تاں زھرشانی ءَ برجاہ دار اِیت ءُ نو سرجمیں بلوچستان ءَ زھرشانی روانک کشگ بیت دانکہ توار چست کُت بہ کن ایں-