پنجگور: زھیر احمد بلوچ ءِ بیگواھی ءَ دہ سال سرجم بوتگ،خدابادان ءَ سیمنارے برجم دارگ بوتگ

زھیر احمد بلوچ ءِ بیگواھی ءَ دہ سال سرجم بوتگ ءُ پنجگور ءِ دمگ خدابادان ءِ ھند مواچ بازار ءَ سیمنارے برجم دارگ بوتگ، کہ اود ءَ سیاسی، چاگردی ءُ وکیل رھشوناں بھر زرتگ وھدیکہ بی وائی سی ءِ رھشونانی تواربندیں کلوہ گوشدارینگ بوتگ انت –

مراگش ءَ تران کنان ءَ زھیر احمد ءِ برات کفایت اللہ بلوچ ءَ گوشتگ کہ آئی ءِ برات سیزدہ اپریل دوھزار ءَ پانزدہ ءَ ھما وھد ءَ پوجی پانگسے ءِ نزیک ءَ آوار جنگ بوتگ کہ آ دیم پہ کراچی ءَ رؤگ ءَ بوتگ کہ روچ ء مروچی آئی ءِ ھچ ھال ءُ اھوال نیست – آئی ءَ گوشتگ کہ ما آئی ءِ یل کنائینگ ءَ ھر وڑیں جھد کتگ، وزیر ءُ گزیراں گوں گند ءُ نند کتگ بلے ھچ پہ ھچ –

آئی ءَ گوشتگ کہ زھیر احمد ءِ وڑ ءَ دگہ ھزاراں مردم بیگواہ انت کہ آیانی کھول ءِ مردماں ائید ءِ روچ ءَ ھم وتی دوستیگیں مردمانی اکس اش گون انت ءُ دگانی سر ءَ انت – آئی ءَ بھتام جتگ کہ سرکار وت کانود ءُ رھبندانی لگتمالی ءَ کنگ ءَ انت ءُ نوں زالبولاں ھم آوار جنگ ءَ انت –

کفایت اللہ ءَ گوشتگ کہ سردار اختر مینگل سرکار نہ ایں، بس بلوچ زالبولانی یل کنگ ءِ لوٹ ءَ کنگ ءَ انت – آئی ءَ گوشتگ کہ ما پیپلز پاٹی وڑیں راج دژمنیں پلیٹ فارمے ءَ سیاست کتگ چریشی ءَ من چہ وتی راج ءَ پھلی لوٹ آں –

آئی ءَ گوشتگ کہ سال 2022 ءَ منی برات ءِ ھال شال ءِ بندیگ جاہ ءَ بوتگ، گوستگیں آرمی ءِ چیف جنرل باجواہ ءَ پنجگور ءِ تر ءُ تاب ءِ وھد ءَ آئی ءِ یل کنگ ءِ کول ھم کتگ بلے روچ ءُ مروچی یل کنگ نہ بوتگ –

مراگش ءَ تران کنان ءَ زھیر احمد ءِ زھگ ادیبہ ءَ گوشتگ کہ اگاں آئی ءِ پت ءَ جرمے کتگ گڑا آمیدگس ءَ پیش کنگ بہ بیت ءُ آئی ءَ ملا فرہاد ءِ آوار جنی ھم ترندی ءَ ایرجتگ-

مراگش ءَ بی وائی سی ءِ بنجاھی رھشون ڈاکٹر صبیحہ بلوچ، سمی دین بلوچ ءُ ایمان مزاری ءِ توار بند ھم گوشدارینگ بوتگ انت –

مراگش ءَ ائیشہ، زویہ ءُ دگراں ھم تران کتگ ءُ ھمے لوٹ کتگ کہ اگاں آیانی پت ءَ جرمے کتگ آمیدگس ءَ آرگ بہ بنت –

ڈسٹرکٹ بار ایسوسی ایشن ءِ امان اللہ کریم، مسلم لیگ نون ءِ ڈویژنل صدر اشرف ساگر، بی این پی ءِ دمگی جنرل سیکٹری قدیر احمد ءُ نیشنل پاٹی ءِ گوستگیں سرکماش حاجی صالح محمد بلوچ ءَ تران کتگ ءُ گوشتگ کہ اگاں ھرکس ءَ جرم ءِ کتگ گڑا آئی ءِ پیسلہ ءَ آمیدگس بہ کنت –

امان اللہ کریم ءَ گوشتگ کہ بندیگی ایوکی ءُ بیگواھیں مردمانی جیڑہ کانود ءُ رھبندانی لگتمالی ئے – آئی ءَ گوشتگ کہ پولیس ءِ زمہ داری ایں کہ بیست ءُ چار ادارانی تہ ءَ ایاں آمیدگس ءَ بیار ایت – ما بار ءِ پلیٹ فارم ءَ چہ اے جھد ءَ ھر فورم ءَ برجاہ داریں –