بمب تراک، تھرمل اسکوپس، نائٹ وژن : بلوچ لبریشن آرمی ءَ اُرشانی تامر شنگ کتگ

بلوچستان لبریشن آرمی ءَ وتی آفیشل چینل ھکل ءَ یک تامر ءِ شنگ کتگ کہ اود ءَ بلوچستان ءِ جتا جتائیں جاھاں پاکستانی پوج ءِ سر ءَ بیتگین اُرش پیش دارگ بیتگ انت-

تامر ءِ بندات کلات ءِ دمگ بربوئی ءَ یک بمب اُرشے پیشدارگ بیت اِنت کہ اود ءَ بلوچ لبریشن آرمی ءِ سرمچاراں پاکستانی پوج ءِ سر ءَ اُرش کتگ ءُ کارندہ کشتگ انت ءُ آیانی گاڑی تباہ کتگ-

تامر ءِ ندارگ ءَ تمپ ءُ جیونی ءِ دمگاں پوج ءِ کاروان ءَ ھواریں گاڑیانی سر ءَ آئی ای ڈی اُرش کنگ بیتگ ابت کہ بازیں گاڑی یے نشانگ بیت انت ءُ پورسز ءِ کارندہ کُشگ ءُ زدگ بوگ ءَ گندگ کاینت اِنت-

بی ایل اے ءِ شنگ کتگیں تامر ءَ پنجگور ءَ پاکستانی پوج ءِ واستا مڈی بروکیں ٹرکانی سر ءَ اُرش، ڈیتھ اسکواڈ ءِ اُرش ءُ بلیدہ ءَ بمب ڈسپوزل اسکواڈ ءِ سر ءَ کتگیں اُرش ھوار انت-

گیش، میر آباد ءُ ھیر آباد ءَ پاکستانی پوج ءِ بنجل ءِ سر ءَ گرنیڈ لانچراں گوں کنگ بیتگیں اُرشانی فوٹیج پیشدارگ بیتگ انت-

مستونگ ءَ پولیس ءِ کارندھانی چیک پوسٹ ءِ سر ءَ اُرش، آیانی ھلوچ کنگ ءَ پد آیانی سرکاری سلاھانی برگ ءِ تامر دیم ءَ کیت انت ءُ پد ءَ کارندھاں یل دے اَنت-

تامر ءِ گڈسر ءَ بلوچ لبریشن آرمی تربت ءَ فرنٹیئر کور ورکس ( ایف ڈبلیو او) ءِ سائٹ ءَ نشانگ کنگ ءَ گندگ بنت اِنت کہ اود ءَ کمپنی ءِ مشینری تباہ کنگ بیت اِنت-

بی ایل اے ءَ اے دراھیں اُرشانی زمہ واری من اتگ انت ءُ درشان ھم شنگ کتگ انت-