بلوچ یکجھتی کمیٹی ءِ سروک ڈاکٹر ماہرنگ بلوچ ءُ اے دگہ سروکانی ھلاپ ءَ تری ایم پی او ءِ درھواست ءِ گوشدارگ مرچی بلوچستان ہائی کورٹ ءَ بوتگ ۔
جسٹس اعجاز احمد سواتی ءُ جسٹس محمد عامر نواز رانا ءِ ھواریں ڈبل بنچ ءَ درھواست گوشدارگ بوتگ۔
ڈاکٹر ماہرنگ بلوچ ءِ نیمگ ءَ آمیدگس ءِ دیما کامران مرتضی، راھب بلیدی، خالد کبدانی، علی احمد کرد ءُ اے دگہ وکیل پیش بوتگ اَنت۔
ھردوکیں نیمگ ءَ آمید گس ءِ دیم ءَ دلیل پیش کنگ بوتگ اَنت۔ آمید گس ءَ درھواست ءِ وکیلاں آرٹیکل 5 ءِ رد ءَ ھلپ نامہ پیش کنگ ءِ کڈنی کتگ ءُ درھواست ءِ گوشدارگ نیم کلاک ءَ مھتل کتگ۔
درھواست گزار ءِ نیمگ ءَ آرٹیکل 5 ءِ رد ءَ آمید گس ءَ ھلپ نامہ پیش کنگ بوتگ، ھلپ نامہ پیش کنگ ءَ پد ایڈووکیٹ جنرل عدنان بشارت ءَ ھلپ نامہ ءِ سر ءَ جتا جتائیں ایراد کتگ۔ آمید گس ءَ دو نیمگانی وکیلانی دلیلاں پد درھواست ءِ سر ءَ وتی پیسلہ ڈب اتگ۔
کونسل ءِ وکیل کامران مرتضی ءَ رسانکدر ءَ گوں تران کنان ءَ گْوشتگ کہ کیس ءِ سر ءَ گپ ءُ تران بوتگ، شریں چیزانی اُمیت ھست، منی ھیال ءَ ردیں پرمان داتگ، گمان اِنت یک ءُ نیم روچ ءَ پد کیس ءِ پیسلہ ءِ جار جنگ بیت۔
کامران مرتضی ءَ گشتگ کہ اے درھواست ڈاکٹر ماہ رنگ ءِ گھار ءَ داتگ۔