زوراکی ءِ بابت ءَ ؛ فرانز فینن
نبشتہ کار: سؔعودناز
دی بلوچستان پوسٹ
فرانز فینن وتی کتاب افتادگان خاک ءِ توک ءَ راجانی سر ءَ ایردست ءِ یکشلیں زوراکی ، ھمے زوراکیانی بوھوکیں زھنی ءُ نپسیاتی اثرات ، ایردست ءُ ھندی مردمانی سیادی ، زورگیر وتی زورگیری ءِ مُھکم دارگ ءُ مضبوط کنگ ءِ ھاتر ءَ کجام کجام پالیسیاں کارمرز کنت ءُ اے دگہ جیڑھانی سر ءَ گپ کنت درستاں گیش ءُ گیوار کنت پہ وانوک ءُ ایردستیں راجاں ، فینن ءَ زوراکی ءُ آئی ءِ نفسْیاتی اثراتانی سر ءَ وتی کتاب ءِ اَندر ءَ چے نبشتہ کُتگ اے نبشتانک ءِ توک ءَ ما ھمایانی پر ریچگ ءِ جُھد ءَ کن ایں شُما ایشی ءَ راجی آجوئی ءِ نام ءَ بدے اِت اگاں نا راج ءِ یک راجی کالبے ءَ پِٹ بوھگ ءِ نام ءُ راجی تاکت ءِ برجم دارگ یا ھمے زوراکیانی دارگ ءِ نام ءَ بدے اِت بلے اِستعمار یا زورگیر ھر وھد ءَ گوں زوراکیاں ءُ گوں تاکت ءَ پروش دیگ بیت ، ما ھر ھساب ءَ اگاں چار ءُ تَپّاس بکن ایں اے یک سرجمی ءَ بدل بوھوکیں ءُ نوکیں دروشمے ءَ دیم ءَ آ یوکیں سسٹم ءِ نام اِنت کہ زوراکیانی دیم ءَ پہ زور جوابی ءَ دیگ بیت اگاں ما سْیاسی ءُ اقتصادی دیمرویانی نیمگ ءَ چمے بجن آں اوں استعمار ءِ باج نہ برگ یک سرجمیں ءُ نوکیں مٹّی یے آرگ ءَ گوں بیت اِنت ایردستیں مردمانی زانت ءُ آیانی زندگی ءَ ھمے بدلی سرجمیں ترندی ءِ گوما دیم ءَ کیت اِنت ، استعماری پُروش وَرگ کہ آئی ءِ متلب یک نوکیں نظامے دیم ءَ آرگ اِنت فطری حادثہ ءُ آئی ءِ گوما مھروان بوھگ ءَ پہ ھلاس نہ بیت اِنت ، زورگیری شکست کہ ما ءُ شما زان ایں یک تاریخی عملے اے گوں ترندیں تشدد ءَ پروش دیگ بیت اِنت اگاں ما اے گپ ءِ سر ءَ باور بدار ایں کہ مئے زندگی اَنچو کیمتی اِنت اَنچو کہ زورگیر ءِ گُڑا ما زورگیر ءِ چماں ءُ آئی ءِ آواز ءُ زوراکیانی پہ پروش دیگ ءَ چو آسِن ءَ مھکم بوت نہ کناں چے ءَ کہ منی زندگی اگاں ھاس اِنت گُڑا ھمے ھاس بوھگ ایوک ءَ پہ اِستعمار ءِ پروشگ ءَ ھرچ ءُ درچ بہ بیت اِنت ،اے وڑ ءَ نہ اِنت کہ آئی ءِ ھست بوھگ پہ من ءَ ھزاب ءُ سردردے نہ اِنت آ وَ ھست اِنت بلے من نوں آئی ءِ واستا اَنچیں توجیل سازگ ءَ آں کہ پہ تَچگ ءُ نیست ءُ نابود بوھگ ءَ ابید آئی ءِ کِر ءَ دگے ھچ راہ پشت نہ کپ اِیت ، کالونیل پاورانی ھاسیت ھمیش اِنت کہ آوانی زوراکی ءِ آماچ سجھیں آبادی بیت اِنت ، بلے کالونیل تاکتانی پروش دیگ مردمانی نَسلی یا راجی سورت ءَ یکجاہ کنگ ءُ سجھیں آبادی ءَ یک کالبے ءَ پِٹ کنگ ءَ گوں کامیاب بیت اِنت ، مارا سنگالی زمین دوستانی ھما ترسناکیں گپ یات اَنت کہ آیاں وتی وزیر سنگھور ءِ تریکہ کارانی سر ءَ گُشتگ اَنت ” مئے اے ڈیمانڈ اَنت کہ مزن مزنیں جاگہ ءُ ھنداں افریقی مردم آرگ بہ بنت ءُ نوں سنگھور یورپی مردماں افریقی جوڈ کنگ ءَ اِنت “ ایشی ءِ متلب ھمیش اِنت کہ ھندی مردم اے گپ ءَ بزان اَنت کہ استماریت ءَ پروش وارتگ اگاں اِناں نوں پد ءَ چُش بیت کہ ھندی مردم ھرابیں دیمروی ءُ ترکیاں پندل سرپد بوان کن اَنت ، اے پیمیں ایردستی مُلکاں کہ ھمود ءَ پہ آجوئی ءَ راستیں ءُ ھکّیں جُنز جُنز اِتگ اَنت مردمانی ھون رتکگ اَنت بازیں مدتے ءَ داں جُھد بوھگ ءَ پد بازیں مردم ءُ دانشورے پُشت ءَ کِنز اِتگ ءُ بزگیں راج ءِ گوما آیانی ھال اَتکگ ءُ اے بوتگ گُڑا اِد ءَ زورگیر ھمے پیمیں سروکانی سروکی ءَ ھلاس کنت ءُ ایردستیں مردمانی اُستاد ءُ رھشونانی مجگاں ھمے گپ ءِ نادینگ ءِ جُھد ءَ کنت کہ بنیادی ھاسیت مدام ھست بنت ءُ شما اَنگت ءَ ھست ءُ وتی راج ءِ سروک اِت زورگیر ءُ ایردست بوتگیں مردمانی زندگی سک ءَ ھزاب ءُ سِلکاریاں چہ سر ریچ بیت اِنت یک بدنامیں اِسٹیجے سر کنگ بیت اِنت ھمے پیم ءَ پیداک بنت ءُ ھمے وڑ ءَ مِر اَنت ھمے بزگ ھچ کِمار کنگ نہ بنت اِشانی میتگ ءُ بازار ءَ گُژنگی ءُ شُد ءِ بادشاھی بیت اِنت بلے آیانی مُلک ءَ سُھر ءُ تِلا ، کویلہ ءُ کُدرتی مڈّی مُچ بیت اِنت بلے اَنگت ءَ آیانی میتگ ءُ بازار اود ءِ مردم چہ درستاں کمتر لیکگ بنت ءُ ایر جَنگ بنت گُلام ھما چماں گوں زوراک ءِ شھر ءُ بازاراں گِند اِیت آ چم چہ زھر ءُ کینگ ءَ پُر بنت ءُ آیاناں وتی ھما بزگی ءِ زوراکی دیم ءَ کیت اِنت ھمے چمانی توک ءَ آیانی وت واجھی ءِ واب مان اَنت-
کسان کسانیں وشیانی واستا تلوسگ دانکہ ورگ ءُ وپسگ ءُ آرام ءَ بگر ھر وڑیں ماملاتانی واستا بزگ ءُ ڈالچار کنگ بنت ھمے میان ءَ ھندی مردم یا گُلام شریں وڑے ءَ زورگیر ءِ ھمے ھکیکتاں سرپد بوھان کن اَنت ، وھدے دوئینانی چم ، چم پہ چم ءُ دیم پہ دیم بنت اِنت گُڑا زورگیر اوں بزگی ءُ ایردست ءِ ھمے واباں سرپد بیت ءُ زانت کہ اے مردم اے واجھی ءِ واھگدار اَنت ءُ منی کُرشی ءُ مکام ءَ گِرگ لوٹ اَنت ءُ اے گپ ھکیکتے کہ روچے توک ءَ المی ءَ یک رندے ایردست زورگیر ءِ وڑ ءَ وشھال بوھگ ءِ واب ءَ گِند اَنت اے دنیا دو بھرانی توک ءَ بھر اِنت یکے زورگیر ءُ دومی ایردست اِنت اِد ءَ دوئینانی زندگی کنگ ءِ طریقہ کارانی توک ءَ مزنیں تپاوتے ھست اِنت اَنچیں ھکیکتے ھست اِنت کہ چہ کرناں چیر دیگ بوھگ ءَ اِنت زوراک ءُ لگتمال بوتگیں مردمانی توک ءَ مجگی بیماری پیداک کنوکیں مردم سک ءَ باز اِنت ءُ ایشی ءِ ھمراھی ءَ زورگیر ءِ لشکر ءُ لشکری مردم ھندی مردمانی گوما یک مُھکمیں رشتھے دارگ ءِ جھدے کن اَنت ءُ توپک ءُ آس بریں سلاھانی زور ءَ ھندی مردماں اِیمن بوھگ ءِ ھُکم ءَ دے اَنت اِد ءَ ساپ زاھر اِنت ھکومتی مردم اُوں زوراکی ءِ زبان ءَ گوں مردماں گپ کن اَنت ءُ وتی ھما زوراکی ءِ چیر دیگ ءِ جُھد ءَ کن اَنت ءُ ھندی مردمانی لوگ ءُ آیانی مجگانی توک ءَ پیگمبر بنت ءُ کاینت ءُ آیاناں وشیں واب پیش دار اَنت ھما میتگاں کہ ھندی مردم نشتگ اَنت ءُ ھمود ءَ کہ زورگیر اِنت دوئیں ھندانی میان ءَ بلاھیں تپاوتے ھست اِنت ، زورگیر ءِ ھند سنگ تراش ءُ ٹوھیں ماڑی ءُ مزنیں سڑک ءُ رنگ ءُ پُل ءُ شوشنگانی شھر بیت اِنت کہ اود ءَ ھر مردم ءَ زندگی کنگ ءِ ھکّ ءُ سرجمیں ھاسراتی دیگ بنت بلے ھندی مردمانی زندگی دم توس کنگ بیت اِنت-
ایردست راجدپتر جوڈ کن اَنت ءُ ھمے زانت آیانی توک ءَ رُدوم زور اِیت ھما راجدپتر کہ آیانی وتی اِنت ھما کہ آیاں وتی بزگی گُژن ءُ گُلامی ءِ درداں گوں نبیسّ اِتگ ھندی مردم گوں بازیں پندلاں اَنگِر کنگ بنت نسل ءُ ٹَکّی بنیاد ءَ ٹُکر ٹُکر ءُ بھر ءُ بانگ کنگ بنت اولی سبک کہ ھندی مردم ئِے سِکّ اَنت ایش اِنت کہ آیاناں یک ھاسیں پترّے سر ءَ اوشتگی اِنت ءُ ھمے یکمُشتی ءِ کالب ءَ چہ در میا اَنت، من واب گنداں کہ من تچگ ءَ آں سُرگ ءَ آں ھندگ ءَ آں موٹر سیکل منی دُمب اَنت کس منا گپت نہ کنت ایردستی ءِ موسماں من بزاں ایردست شپ ءَ بگر داں سباہ ءَ آجوئی گرگ ءِ جُھد ءَ چے یک کِر نہ باں ، ایردست ءِ ھَڈّانی توک ءَ ھما زھر کہ مان اَنت اول سر ءَ ھمے زھر وتی زمین دوستانی ھلاپ اِنت مردماں پہ کارمَرز بنت ، اے ھما زمانگ اِنت کہ نیگرو یکے دومی ءَ جَن اَنت ، پولیسءُ مجسٹریٹ شمالی افریقہ ءَ گناھانی دیمپان بنت ءُ نہ زان اَنت کہ کجام نیمگ ءَ برو اَنت ، ھندی مردم وھدے زورگیری ءِ موسمانی زندگی کنگ ءَ بنت اِنت گڑا آیانی سما بیت کہ آ مزنیں تاوانانی دُچار اَنت ، زورگیر ءِ دنیا دژمنیں دنیا یے کہ آ ھندی مردماں مدام ولگوج کنگ ءِ جُھد ءَ کنت چُک چینی ءِ دروشم ءَ ، اے ھما دنیا بیت اِنت کہ ھندی مردم ایشی ءَ زھر ءِ نگاھاں گوں چار اَنت ءُ گوں درداں توانا بوھان کن اَنت ھندی مردم زورگیر ءِ پیم ءَ وشھالی زند گوازینگ ءِ واھگدار بنت بلے زورگیر بوھگ ءِ اِنا چے ءَ کہ آیاں زورگیری ءِ بدتریں صورت دیستگ بلے زورگیر گیش زورگیر ءُ ھمے داب ءَ زالم بوھگ ءِ واب ءَ گند اِیت مدامی ، ھندی مردم ھروھد ءَ سوھو بنت ھمے دنیا ءَ کہ ھندی مردم مدام گناھگار ءِ چماں چارگ بنت اود ءَ بوت کنت ھندی مردماں وھد لَگ اَنت بلے ھمے سما ءِ جند آیانی توک ءَ المی ءَ ودی بوھان کنت اِنت-
نوں پد ءَ میزان میزان ءَ زورگیر ءِ دنیایے ءُ ھمے زوراکی ءِ نظام ءِ پھمگ ءُ آئی ءِ تباہ کنگ ءِ تصور ارزان بوان کنت ءُ گیش اِیت اِنت ءُ ھر ھما مردم ایشی ءَ وتی مجگ ءِ توک ءَ نَکش کُت کنت کہ آ ھمے آبادی ءِ بھر اِنت ، زورگیری ءُ زوراکی ءِ نظام ءِ ھلاس بوھگ ءِ متلب ایش نہ اِنت کہ دوئیں ملکانی سیمسر بس جتا بہ بنت ءُ اَنگت ءَ آیانی میان ءَ رابطہ برجاہ بہ بیت اِنت زورگیری دنیا ءِ نیست ءُ نابود بوھگ ءُ متلب ساپ ھمیش اِنت کہ زوراک آئی ءِ ھند ءُ آئی ءِ ھستی ءَ چہ بُنڈال ءَ ولگوج بکن یا ایشی ءِ زمین ءِ چیر ءَ کَل بکن یا نا گڑا چہ وتی مُلک ءَ گلینگ بہ بیت-
ھما زوراکی کہ زورگیر ءِ ھمے زوراکی ءِ نظام ءِ جند ءَ زندگ دار اِیت اِنت اے زوراکی ھندی مردمانی چاگردی اَکس ءَ پہ مدامی واستا بربادی ءِ نمیگ ءَ برگ ءِ جھد ءَ کنت اِنت ءُ لس مھلوک ھمے زوراکی ءِ دیم ءَ داں ھما وھد ءَ اوشت اَنت داں آیانی وتی دستاں گوں یک نوکیں راجدپتر ءُ نوکیں نظامے رُدوم بزور اِیت ءُ دیم ءَ بئیت اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-