شال ءَ ھوار بلوچستان ءِ جتاجتائیں دمگاں یک رندے پد ءَ انٹرنیٹ ءِ سروس بند کنگ بوتگ انت۔ موبائل فون ءِ انٹرنیٹ سروس لھتے روچ پیسر ھم بند کنگ بوتگ ات انت۔
خضدار، قلات ءُ منگچر ءَ گوستگیں شش روچاں پد پچ انٹرنیٹ دوبر بند کنگ بوتگ انت۔
دمگی اھوالانی رد ءَ انٹرنیٹ سروس کہ قلات، خضدار ءُ منگچر ءَ شش روچ ءَ پد پچ بوتگ انت ایوک ءَ سئے کلاک ءَ پچ بوھگ ءَ پد پد ءَ بند کنگ بوتگ۔
دمگی مردمانی گشگ انت کہ انٹرنیٹ ءِ مدام بند بوھگ ءَ چہ کاروباری لین دین، نودربرانی آن لائن وانگ ءُ زانگ ءُ دگہ ھاسیں جیڑھ سک باز تاوان رسگ ءَ انت۔
شھریاں گوں سیادی داروکیں واکداراں دزبندی کتگ کہ انٹرنیٹ سروس ءَ را دائمی رنگ ءَ بھال کنگ بہ کن انت دانکہ الس ءَ را گیشیں مشکلات ءِ آماچ مہ بیت۔
انٹرنیٹ بند بوھگ ءِ سبب ءِ بابت ءَ سرکاری ادارگانی نیمگ ءَ انگت ءَ سرکاری بیان شنگ نہ بوتگ۔
شھریاں گش انت کہ نوکیں دور ءَ انٹرنیٹ پہ ھرچ ماشی ءُ وانگ ءُ زانگ ءِ کار ءَ یک بنیاتی لوٹے ءُ ایشی ءِ نہ بوھگ ءَ چہ لس مھلوک سکیں گرانیں تکلیپے ءِ آماچ بوھگ ءَ انت۔