بلوچ یکجھتی کمیٹی ءِ بندیگیں رھشون ڈاکٹر ماھرنگ بلوچ ءَ چہ شال ءِ ھدہ جیل ءَ باسکانی نام ءَ نمدی یے نبشتگ ءُ گوشتگ کہ منی باسما ءُ کرتنی ءُ دلیریں سنگتاں!
من سرپداں کہ ھک ءُ انساپ ءِ جھد سک باز گران بیت انت، وتی ھک ءُ لوٹانی ھاتر ءَ مارا پُلانی ناں بلکیں کنٹگانی سر ءَ گوزگ کپ ایت، من ءَ پھر انت کہ مروچی منی سنگتاں اے تُرند ءُ نگیگیں جاور کبول کُتگ ءُ دلیری ءَ گوں اشتاتگ انت –
آئی ءَ نبشتگ کہ اے جیل ءِ تھاریں جھان ءَ تو ھچ ءَ سرپد نہ ئے نہ زان ئے شپ انت کہ روچ انت ءُ ناکہ ڈن ءِ گواتے تر ءَ سر بیت – ھمودا من ءَ ھمے ھبر کہ سر بوتگ کہ منی دزگیری ءَ پد منی سنگت یک ساھتی ءَ ھم ھاموش نہ بوتگ انت ءُ اے نگیگیں جاورانی تہ ءَ ھم وتی راجی گھگیری ءِ زرمبش مھکمی ءَ داشتگ ات گڑا اے تھاریں کوٹی ءَ ھم من مار اِتگ کہ رژناہ انت – من وتی ماتیں سرڈگار ءِ تاجگیں ءُ وشیں گوات مار اِتگ ءُ منی سر پہ پھری ءَ بُرز بوتگ کہ منی سیادی گوں ھما باسما، کرتنی ءُ دلیریں مردمان انت کہ آ وتی سر ءَ بُرائیناں بلے جھل نہ کن انت –
آ دیمتر ءَ نبشتہ کنت کہ مارا چہ وتی ھک ءُ لوٹانی گرگ ءَ ھچ وڑیں زور داشت نہ کنت ءُ ناکہ مارا نزور کت کنت – مارا ھر ھال ءَ وتی ھک ءُ لوٹانی ھاتر ءَ پُرایمنیں جھد برجاہ دارگی انت، پرچاکہ مئے رکگ ءں راہ بس ھمے جھد ءِ تہ ءَ انت ءُ ھاموشی مئے درسانی مرگ انت – مئے جزباتی کنائینگ ءُ مئے پُرایمنیں جھد ءِ درگان درگان کنگ ءِ ھاتر ءَ وڑ وڑیں ھُنر کنگ بوگ ءَ انت، وڑ وڑیں سازش کنگ بوگ ءَ انت بلے مارا ھچ وڑ ءَ چہ وتی جھد ءَ پد کنزگی نہ انت، بلکیں ھر وڑیں نگیگیں جیڑواں ابید جھد برجاہ دارگی انت، پرچاکہ اے ایوک ءَ مئے ھک نہ انت بلکیں مئے سر ءَ پرز انت ھم –
ایشی ءِ ھمراھی ءَ من شمارا درساں گوں دستبندی کناں کہ زورانسری آوار جنگ بوتگیں مردمانی کھولاں ھچ وڑ ءَ ایوک ءَ یل مہ دے اِت – اے مات، گوھار ، تپلیں زھگ ءُ کماشانی شمارا ھوسلگ بوگی انت، آیانی ھر توار ءَ لبیک گوشگی انت آ دریانی رھم ءَ یل دیگی نہ انت بلکیں آیانی جھد ءَ کرتنی ھوار بوگ ءُ آواز چست کنگی انت –
نمدی ءَ نبشتہ انت کہ اے وھد ءَ مستقل مزاجی ءِ تچکیں مانا ءَ شمارا چہ شرتر کس نہ زانت – اے شما ات کہ نگیگیں جاوراں ناکہ تھنا جھد برجاہ داشتگ بلکیں اے راجی زرمبش ءَ گیشتر مھکم کنگ ءَ انت – شمے جھد ءُ دیمھونی اے زرمبش ءَ گیشتر مھکم کن انت – مارا نوں ایوک ءَ اے جھد دارگی نہ انت بکیں اے گیشتر مھکم ءُ ترند کنگی انت – اے زرمبش ءِ سوبمندی مئے سیاسی سما، دورچاری ءُ ایمانداری ءَ گوں بندوک انت، من ءَ شمئے سر ءَ دلجماں کہ شما دورچاری ءُ ایمانداری ءَ گوں اے جھد ءَ سوبمندی ءِ منزل ءَ سر کن ات –
گڈسر ءَ نبشتہ کنت کہ من چہ شما بس ھمے دستبندی ءَ کناں کہ مارا ھر ھال ءَ سبر ءِ دامن گرگی انت – مئے اسلی تاکت مئے ھوسلگ ءُ اوپار ءِ تہ ءَ انت مارا وتی ھوسلگ چو چلتن ءِ کوہ ءَ کنگی انت – مارا مایوس بوگی نہ انت، جزباتی بوگ ءِ جاہ ءَ مارا باسمائی ءُ کارشونی ءَ گوں شئور کنگی انت- مارا مایوس ءُ نزور کنوکانی گپ گوشدارگی نہ انت – مارا وت ءَ چہ مناپکاں دور دارگی – مئے اسلی تاکت مئے پگر یکجاھیں جھد انت – مئے تاکت مئے راج ءِ ھوسلگ دورچاری انت – مارا ھر ھال ءَ وتی تاکت دارگی انت – اے بندیگ جاہ، زمزیل، لٹ ءُ توپک مارا پروش دات نہ کن انت –