بی این پی نندانک : شال ءِ تھی راہ بند، شھر زمینی اِھوال بند

بلوچستان لبریشن نیشنل پارٹی نیمگ ءَ چہ مستونگ نزیک لکپاس ءِ ھند سر ءَ برجاھیں نندانک ءِ سبب ءَ بُنجاھی شھر شال ءَ دگی دمگاں چہ جھلی اھوال بند-

ھکومت ءَ نندانک دارگ واستا شھر ءِ تھی راھانی سر ءَ کنٹینرز ایر کتگ دگ بند کتگ اَنت چریشی ءَ مساپر سک دلسیاھی ءِ دیمپان اَنت-

بی این پی ءِ سروک سردار اختر مینگل ءِ سروکی ءَ کارکنان ءُ درزنانی زھرشانی کنوک لکپاس ھند سر ءَ نندانک دیگ ءَ اَنت، سردار اختر مینگل ءَ وتی کارکنانی ھمراھی ءَ لکپاس سر ءَ عید کنگ پیسلہ کتگ-

ھمے میان ءَ ھکومت ءَ سرجمیں لنک دگ ھم بند کتگ اَنت، آیانی تہ ءَ لکپاس ٹنل، کنڈ میسوری، ءُ اغبرگ ءِ راہ ھوار اَنت-

راجی شھدگ ءِ بندی ءَ دوازدہ دمگ ءَ چہ زمینی اِھوال بند بیتگ اَنت-

شال ، مستونگ، کلات، سوراب، ھُزدار، ھب، لسبیلہ، نوشکی، ھاران، دالبندین، نوکنڈی، واشک ءُ تفتان ءَ چہ زمینی اِھوال بند-

ھکومت ءِ نیمگ ءَ چہ لانگ مارچ دارگ واستا گوستگیں سے روچ ءَ چہ لکپاس ءِ نزیک ءَ کنٹینرز ایر کتگ بی این پی مارچ شال ءَ پُترگ ءَ دارگ اَنت، شھدگانی بندی ءَ چہ ھزرانی مساپر وتی بُنکی دمگاں عید دارگ واستا روگ ءَ بیتگ اَنت، تُرندیں دلسیاھی ءِ دیمپان-

گوستگیں روچ ءَ بلوچستان ھکومت گپ دیوانی ٹولی لکپاس ءِ ھند سر ءَ برجاہ ءَ اِنت بی این پی ءِ نندانکجاہ ءَ سر بیتگ اَنت ءُ ٹولی نندانک ءِ سروک ءَ چہ دزبندی کتگ کہ انّگیں سیکورٹی جاور ءُ عید نزیکی بیگ ءَ نندانک ھلاس بکنت دانکہ راج ءَ دلیساھی دیمپانی مہ بیت-

لکپاس ءِ ھند سر ءَ برجاھیں نندانک ءُ ھکومتی گامگیجی سبب ءَ شال ءِ آ دگہ دمگاں چہ زمینی اِھوال سستگ اَنت، چریشی ءَ راج ءِ تُرندی دلسیاھی دیمپان اِنت-