شال: بلوچ یکجھتی کمیٹی ءِ بنجاھی رھشون ساجی سبگت اللہ دزگیری ءَ پد بیگواہ

بلوچستان ءِ بنجاھی شھر شال ءَ سیٹلائیٹ ٹاؤن ءَ پاکستانی پورسز ءَ بی وائی سی ءِ بنجاھی رھشون شاجی سبگت اللہ آوار جنگ ءَ پد بیگواہ کتگ-

بلوچ ایڈوکیٹ عمران بلوچ ءَ آئی ءِ آوار جنگ ءِ ھال راست کنان ءَ گوشتگ سیٹلائیٹ ٹاؤن ءَ چہ لوگ ءَ پورسز ءَ شاجی سبگت اللہ دزگیر کتگ ءُ برتگ-

زانگ بہ بیت گوستگیں بازیں روچاں بلوچستان ءَ بی وائی سی ءِ سر ءَ بندات بیتگیں کریک ڈاؤن ءَ گیشی اتکگ ءُ آئی ءِ بنجاھی سروک ڈاکٹر ماہ رنگ، بیبرگ بلوچ، سمی دین، بیبو بلوچ ءَ ھوار بازیں باسک دزگیر کتگ ءُ بندیگ کتگ انت-

بلوچستان ءَ بی وائی سی ءِ رھشونانی دزگیریانی ھلاپ ءَ زھرشانی بندات بیتگ انت ءُ زھرشانی سر ءَ پولیس ءِ تیرگواریاں سَے کس بیران بیتگ انت-

دومی نیمگ ءَ بلوچستان نیشنل پاٹی ءِ نیمگ ءَ وڈھ ءَ داں شال ءَ لانگ مارچ بندات بیتگ کہ اے وھد ءَ لک پاس ءَ دھرنا دیگ بیتگ –

اے لانگ مارچ بی این پی ءِ سروک سردار اختر جان مینگل ءِ سروکی ءَ بندات بیتگ ءُ آئی ءِ لوٹ بی وائی سی ءِ لیڈر شپ ءِ یل دیگ ءُ بلوچ زالبولانی یل دیگ ءَ کنگ بوگ ءَ انت-

مروچی سرکار ءِ یک ٹولی ءِ اے گپ ءُ تران ءَ لک پاس ءَ سر بیتگ ءُ اود ءَ دھرنا ءِ ھلاس کنگ ءَ کڈنی کنگ بیتگ ءُ بی این پی ءَ بلوچ زالبولانی دیگ ءِ لوٹ کتگ ءُ گوشتگ اے دھرنا ھما وھد ءَ ھلاس بیت اِنت کہ دانکہ بلوچ زالبول یل نہ بنت اِنت-