کراچی : بی وائی سی زھرشانی سر ءَ پولیس ءِ زوراکی دزگیری، ریاستی پلامرزی روانک ءِ اجازت

کراچی ءَ بلوچ یکجھتی کمیٹی ءِ زھرشانی روانک سر ءَ سندھ پولیس ءَ لَٹ ءُ کُٹ کنان ءَ بلوچ یکجھتی کمیٹی ءِ دو راھشون لالا وھاب ءُ سمی دین ءَ ھوار بازیں مردمے دزگیر کتگ ءُ تھانہ ءَ برتگ اَنت-

بی وائی سی نیمگ ءَ چہ کراچی ءَ اے زھرشانی بلوچستان ءَ زھرشانی کنوکانی سر ءَ ریاستی لَٹ ءُ لُٹ، کوش ءُ گل ءِ راھشونانی دزگیریانی ھلاپ ءَ کنگ بیتگ-

بلوچ یکجھتی کمیٹی ءِ رِد ءَ اے زھرشانی روانک کراچی پولیس اجازت نداتگ ءُ پولیس ءَ زھرشانی کنوک لَٹ ءُ کُٹ ءُ دزگیری کنان ءَ روانک مردم شنگ ءُ شانگ کتگ اَنت-

اے میان ءَ، کراچی پریس کلب ءِ ڈن ءُ دگہ ھندانی سر ءَ دو جتاجتائیں ھلاپ ءَ روانک ھم کشگ بیتگ آیاں بی وائی سی ءُ بلوچ لبریشن آرمی ءِ ھلاپ ءَ ناراہ کتگ ءُ پلے کارڈز چست کتگ بیتگ کہ آیانی سر ءَ بی ایل اے ءُ بی وائی سی ءِ را ءَ چہ سیادی دارگ بھتام نبشتہ بیتگ-

کراچی اِھوالکار رِد ءَ سندھ پولیس نیمگ ءَ چہ اے ھلاپیں روانکانی ناں تھنا اجازت دیگ بیتگ بلے آیاں سرجمی ءَ آسراتی دیگ ھم بیتگ ھالانکہ شھر ءَ 144 جنگ بیتگ چریشی ءِ رِد ءَ راجی مُچی سر ءَ پابندی جنگ بیتگ-

بلے اے زانگ نہ بیتگ کہ اے روانک کجام نیمگ ءَ چہ برجم دارگ بیتگ-

کراچی پریس کلب اِھوالکارانی گوشگ اِنت کرانی ءَ بیتگیں اے وئیلاں سندھ پولیس نیمگ ءَ چہ دوئیں راھبند پدر کتگ کہ اود ءَ یک نیمگے بلوچ یکجھتی کمیٹی ءِ پُرایمنیں زھرشانی تاکت زور ءَ ھلاس کتگ وھدے کہ دومی نیمگ ءَ ریاستی پلامرزی روانکانی اجازت داتگ اَنت-