چہ منگچر ءَ پاکستانی پوج ءِ دست ءَ زورانسری بیگواہ محمد فھیم بلوچ ءُ خادم بلوچ ءِ یل نہ کنگ ءِ ھلاپ ءَ زھرشانی ءَ مروچی سیمی روچ ءَ پُترتگ-
زھرشانی ءَ شال، کراچی بُنجاھی شھدگ ءَ ھوار سرجمیں دگ بند کتگ، چریشی ءِ سبب ءَ دمگ ءَ گاڑیانی روگ آیگ بند اِنت-
زانگ بہ بیت کہ اشی ءَ ساری دو روچ ءَ ھڑتال ءِ میان ءِ انتزامیہ ءَ زھرشانی کنوکاں گوں گپ دیوان کتگ، بلے پد ءَ وتی کتگیں کول ءَ چہ پُشتکنز بیتگ- کھول ءَ ٹکی مردمانی گوشگ اِنت کہ تنی وھدے بیگواھیں مردمانی یل کنائینگ ءَ ھچ وڑیں گامگیج زیر نہ بیتگ، ءُ نانکہ دمگی یا تھسیل انتزامیہ نیمگ ءَ چہ نمائندت گپ دیوان واستا اَتکگ اَنت-
اِھوالکار رِد ءَ زھرشانی گیش تُرند کنگ بیتگ، ءُزھرشانی کنوکانی گوشگ اِنت دانکہ بیگواھیں مردم یل کنگ نہ بنت، نندانک برجاہ بیت، دومی نیمگ ءَ شھدگ بند بیگ سبب ءَ مساپر، ٹرانپسورٹر ءُ دمگی مردم سک دلسیاھی ءِ دیمپان اَنت- شھریانی گوشگ اِنت کہ حکومت ءِ گیر سنجیدگی ءَ چہ کھول ءُ راج ءِ دلسیاھی گیش بیگ ءَ اِنت – شھریاں ھکومت ءُ پوج ءَ چہ لوٹ کتگ کہ زورانسری آوار جنی ءِ گر ءُ دار ڈیھی کانون ءِ رِد ءَ بیگواھیں مردم ءَ آمیدگس ءَ پیش بہ کن اِت-