کیچ ءُ کوھلو: شھدگ سلاہ بنداں بستگ، پوج ءِ سر ءَ اُرش

بلوچستان ءِ دمگ کوھلو ءَ سلاہ بندیں مردماں شھدگ بستگ پٹ ءُ پول کتگ وھدے کہ دو ھندانی سر ءَ پوج اُرش ءِ نشانگ کتگ ءُ ھمے وڑ کیچ ءَ ھم پاکستانی پوج کاروان اُرش ءِ نشانگ کنگ بیتگ-

چارشمبے ءِ روچ ءَ کوھلو ءُ سبی ءِ میانی دمگ برگ ءَ سلاہ بندیں مردماں شھدگ بستگ ءُ بازیں کلاکاں چہ گاڑی پٹ ءُ پول کتگ اَنت-

دمگی اِھوالکار رِد ءَ سلاہ بندیں مردماں پٹ ءُ پول میان ءَ یک لیویز کارمندے یے گپتگ ءُ پد ءَ یل داتگ-

ھمے وھد ءَ پوج ءَ دمگ ءَ پشکدمی کتگ کہ پیسر ءَ سنگر گپتگیں سلاہ بندیں مردماں اُرش کتگ چریشی ءِ آسر ءَ پوج ءَ تاوانانی دیمپانی کنگ کپتگ-

دمگی اِھوالکار رِد ءَ پوج ءَ اے دمگ ءَ دومی رند ءَ ھم پیشکدمی کتگ بلے پد ءَ سلاہ بندیں مردماں آیانی سر ءَ اُرش کتگ-

واکدار اے درگت ءَ ھچ وڑیں درشان شنگ نہ کتگ-

ھمے وڑ بلوچستان ءِ دمگ کیچ ءَ ناشناسیں مردماں پاکستانی پوج ءِ کاروان اُرش ءِ نشانگ کتگ-

پوج کیچ ءِ دمگ تمپ نزر آباد ھند سر ءَ نشانگ کنگ بیتگ-

اِھوالکار رِد ءَ اُرش ءَ یک گاڑی یے سک تاوان بار بیتگ چریشی ءَ سوار کارندہ بیران ءُ ٹپی بیگ ھال اِنت-

اُرش ءَ پد چہ تربت ءَ بالگرد وئیلجاہ ءَ سر بوتگ اَنت ءُ پد ءَ شتگ اَنت-

اُرش درگت ءَ سرکاری نیمگ ءَ ھچ وڑیں درشان دیم ءَ نیتکگ نانکہ اُرش زمہ واری ءَ گلاں زرتگ-