بولان میڈیکل کالج ءِ وائس پرنسپل ڈاکٹر الیاس بلوچ زورانسری بیگواہ

پاکستانی پوج ءَ بولان میڈیکل کالج وائس پرنسپل گوستگیں شپ ءَ زورانسری بیگواہ کنگ بیتگ-

بلوچستان ءِ بُنجاھی شھر شال ءَ گوستگیں شپ ءَ پاکستانی پوج ءَ بی ایم سی ءَ ھوار جتاجتائیں ھندانی سر ءَ ھاسٹلاں بیڑبرتگ، ھمے میان ءَ جھمنندیں نودربر تُرسینگ بیتگ اَنت-

ھالانی رِد ءَ گوستگیں شپ ءَ چہ ڈاکٹر کالونی ءَ بولانی میڈیکل کالج ( بی ایم سی ) ءِ وائس پرنسپل ءُ نامی ئیں سائکٹرسٹ ڈاکٹر الیاس بلوچ ھم پوج کارندھاں آوار جتگ ءُ ناشناسیں جاھے ءَ برتگ-

ڈاکٹر الیاس ءِ درگت ءَ چہ تنی وھدے ھچ وڑیں ھال نیست-

زانگ بہ بیت گوستگیں شپ ءَ بلوچ یکجھتی کمیٹی ءِ راھشون بیبگر بلوچ ءُ آئی ءِ برات ھمل بلوچ ھم چہ لوگ ءَ آوار جنگ ءُ بیگواہ کنگ بیتگ اَنت-

ھمے وڑ چہ مستونگ ءَ چار مردم چہ لوگاں آوار جنگ ءُ بیگواہ کنگ بیتگ اَنت-

بلوچ یکجھتی کمیٹی ءَ مروچی نیمروچ سے ءَ شال ءَ بلوچستان یونیورسٹی ءِ دیم ءَ زھرشانی ءِ جار جنگ بیتگ-