ڈیرہ بگٹی ءَ مزنیں کچے ءَ لشکر کشی، نوکیں چوکی جوڑ کنگ بوتگ ءُ بازیں مردمے بیگواہ

ڈیرہ بگٹی ءَ پاکستانی پوج ءِ نیمگ ءَ چہ لوگانی سر ءَ بیڑ، مردم زورانسری بیگواہ، دگہ نوکیں پوجی چوکی جوڑ کنگ دْرچ برجاہ ءَ اِنت-

بلوچ ریپبلکن پارٹی بی آر پی ءِ جارکش شیر محمد بگٹی ءَ گْوشتگ کہ بلوچستان ءَ ریاستی زوراکی ءُ زورانسری آوار جنی ءِ درگت ءَ یک سنگین ءِ جاور ھال پدر کنت آیانی رِد ءَ پاکستانی ریاستی ادارہ بلوچ راج سر ءَ زُلم ءُ زوراکی تہ ءَ گیشی آرگ ءَ اِنت ، ءُ انسانی ھکانی سنگین ءِ ھلاپ ورزی برجاہ ءَ اِنت-

بی آر پی ءِ جارکش ءِ گوشگ اِنت کہ پاکستانی چیریں ادارہ آئی ایس آئی ءُ سی ٹی ڈی ءَ سوئی ءُ ڈیرہ بگٹی ءَ بیڑبرتگ کہ بے میاریں بلوچ زورانسری آوار جنی ءِ نشانگ کتگ اَنت ءُ لوگاں زالبول ءُ زھگ لَٹ ءُ کُٹانی نشانگ کتگ اَنت-

بلوچ ریپبلکن پارٹی ءِ رِد ءَ بیڑ وھد ءَ پاکستانی پوج ءَ علی بیگ ء پاھی بگٹی، جمال ء پاھی بگٹی، پیر جان ء کرمان بگٹی، علی خان ء جانی بگٹی، درہ ء محمد بخش بگٹی، دادو ء کرمان بگٹی، ءُ حیدر ء دل محمد بگٹی آوار جنگ ءَ پد ناشناسیں جاھے ءَ برتگ اَنت-

جارکش ءَ گْوشتگ کہ انّیگاں ریاستی لَٹ ءُ کُٹ ءُ زورانسری آوار جنی اے گپ ءَ پدری اِنت کہ ریاستی پوج بلوچ راج ءِ ھلاپ ءَ بے رھمی گامگیج زیرگ ءَ اِنت اے وئیل ءَ بلوچستان ءَ ھمکروچی جوڑ بیگ ءَ اَنت ءُ آئی ءِ گیشی ھچ وڑ کمی نیاگ اِنت-

اے میان ءَ بی آر پی ءَ میان استمانی، اکوام متھدہ، انسانی ھکانی گل ءُ انساپ دوستیں مردم ءَ چہ لوٹ کتگ کہ آ بلوچستان ءَ انسانی ھکانی ءِ لگتمالی سر ءَ توار چست بہ کن اَنت ءُ زورانسری آوار جنی ءِ ھلاپ ءَ گامگیج بزیر اَنت-

شیر محمد بگٹی ءَ دیمتر ءَ گْوشتگ کہ ڈیرہ بگٹی ءَ پاکستانی پوج نیمگ ءَ چہ نوکیں چوکی جوڑ کنگ کار ھم کنگ بیگ ءَ آئی ءِ گوشگ اِنت کہ ڈیرہ بگٹی ءِ دمگ مرو ءَ سے نوکیں چوکی جوڑ کنگ بیتگ وھدے کہ ڈیرہ بگٹی شھر ءِ تہ ءِ میانی ءَ یک پوجی چوکی یے جوڑ کنگ بیتگ-

جارکش ءَ وتی درشان ءِ گُڈی ءَ گْوشتگ کہ سوئی ءِ نزیک ءَ کچی ءَ ھم نوکیں چوکی جوڑ کنگ بیگ ءَ اِنت آیانی سبب ءَ چہ دمگ مردم ءُ راہ ءَ رؤکیں مردم ءُ نادُراہ سک تکانسری آماچ کنگ بیگ ءَ اَنت وھدے کہ دمگاں چہ گوزوکیں گاڑیاں زر ھم گرگ ءَ اَنت-