ھاران، بلیدہ، زامران ءُ کلات ءَ پاکستانی پوج ءِ سر ءَ اُرشانی زمہ واریاں من ایں – بی ایل اے

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ سرمچاراں ھاران، بلیدہ، زامران ءُ کلات ءَ پنچ جتا جتائیں اُرشانی وھد ءَ زورگریں پوج ءُ آئی ءِ کمکار نشانگ کتگ انت- آئی ای ڈی تراک ءُ پوسٹانی سر ءَ اُرشانی آسر ءَ دشمنیں پوج ءِ شش کارندہ کشتگ ءُ بازینے زدگ کتگ انت-

جارکش ءَ گوشتگ بلوچ لبریشن آرمی ءِ سرمچاراں کیچ ءِ دمگ بلیدہ زیردان ءَ زورگریں پاکستانی پوج ءِ بمب ڈسپوزل اسکواڈ ءِ پندی کارندہ ھما وھد ءَ پشت ماں پشت ءَ دو آئی ای ڈی تراکانی نشانگ کتگ انت کہ آ کلیئرنس ءَ دزبند بیتگ – اے تراکانی آسر ءَ دشمنیں پوج ءِ دو کارندہ جاہ پہ جاہ ءَ مرتگ انت ءُ یکے زدگ بیتگ-

جارکش ءَ گوشتگ بی ایل اے ءِ سرمچاراں کیچ ءِ دمگ زامران گیشردان ءِ ھند ءَ زورگریں پاکستانی پوج ءِ کاروان ءَ ھواریں یک گاڑی یے آئی ای ڈی اُرش ءِ نشانگ کتگ – چریشی ءِ آسر ءَ دشمن ءَ جانی ءُ مالی تاوانانی دیمپانی کنگ کپتگ-

جیئند بلوچ ءَ گوشتگ بلوچ لبریشن آرمی ءِ سرمچاراں یازدہ مارچ ءَ ھاران ءَ گزی دگ ءَ ھستیں زورگریں پاکستانی پوج ءِ پوسٹ ءِ سر ءَ اُرش کتگ- اے کاروائی ءَ سرمچاراں دشمنیں پوج ءِ پوزیشنز ءِ سر ءَ گرنیڈ لانچر آس داتگ انت ءُ چریشی ءَ دشمن ءَ جانی ءُ مالی تاوانانی دیمپانی کنگ کپتگ-

جارکش ءَ گوشتگ یک دگہ کاروائی یے دوازدہ مارچ ءِ شپ ءَ بی ایل اے ءِ سرمچاراں ھاران ءِ دمگ گرک ءُ دالی ءِ میان ءَ زورگریں پاکستانی پوج ءِ پوسٹ نشانگ کتگ – اے اُرش ءَ وتکار ءُ راکٹ لانچرانی کارمردی کتگ- کساس بیست دمان ءَ برجاھیں جنگ ءَ دشمن ءِ سَے کارندہ جاہ پہ جاہ ءَ مرتگ انت ءُ کم چہ کم چار زدگ بیتگ انت- ایشی ءَ ابید زورگریں پوج ءَ گیش مالی تاوانانی دیمپانی کنگ کپتگ-

جارکش ءَ گوشتگ بی ایل اے ءِ سرمچاراں گوستگیں روچ ءَ کلات ءِ دمگ منگچر بازار ءَ پاکستانی پوج ءُ چیریں ادارھانی ایجنٹے ءِ سر ءَ تیرگواری کتگ ءُ کشتگ – اے مرد گنوگی دروشم ءَ زورگریں پوج ءِ واستا چاریگری ءِ کار ءَ بیتگ-

جیئند بلوچ ءَ گوشتگ بلوچ لبریشن آرمی اے درستیں اُرشانی زمہ واریاں من ایت-