شال : لاشانی پجّار ھاتر ءَ آؤکیں بیگواھیں مردمانی کھولانی سر ءَ پوج ءِ زوراکی

نادُراھجاہ ءَ مُچیں جنین چُک ءُ کماشانی سر ءَ پوج ءِ کارندھاں لَٹ ءُ کُٹ کتگ اَنت-

گوستگیں روچاں نادُراھجاہ ءَ آورتگیں ناشناسیں لاشانی پجّار کنگ ھاتر ءَ بلوچستان ءِ بازیں بیگواھیں مردمانی کھول شال نادُراھجاہ ڈن ءَ سے روچ ءَ مُچ اَنت کھول نادُراھجاہ ءَ آورتگیں لاشانی پجّار لوٹ ءَ کنگ ءَ اَنت-

اے میان ءَ پاکستانی پوج ءَ نادُراھجاہ دیم ءَ مُچیں کھولانی سر ءَ لَٹ ءُ کُٹ ءِ نشانگ کتگ اَنت ءُ آیاں پاد کنگ جُھد کتگ-

اے وھد ءَ شال نادُراھجاہ ڈن ءَ بازیں زورانسری آوار جنگ بیتگیں مردمانی کھول ءُ انسانی ھکانی باسک ساڑی اَنت-

شال نادُراھجاہ ءَ آرگ بیتگیں لاشانی درگت ءَ پوج ءِ واکدار گوشگ اِنت کہ اے مردم جعفر ایکسپریس اُرش ءَ پد کلیئرنس آپریشن ءَ جنگ بیتگیں سلاہ بندیں جنگولانیگ اَنت، بلے کھول اشانی پجّار کنگ لوٹ ءَ کنگ ءَ اَنت-

اے وھد ءَ پنچ مردم لاشانی پجّار کنگ ءَ پد وتی دسیتگ کتگ اَنت ءُ کھول پوج ءِ لَٹ ءُ کُٹ ءِ بگیری ءَ زھرشانی ھم کنگ ءَ اَنت-

ھمے وڑ شال ءِ کاسی کبرستان ءَ پولیس ءُ دگہ واکدار نیمگ ءَ چہ شپ وھد ءَ سیزدہ لاش کل ءُ کسارت کنگ ءَ سر ءَ ھم مردمانی تہ ءَ تُرس ودی بیتگ-

زانگ بہ بیت کہ بلوچستان ءَ اشی ءَ ساری بازیں وئیلاں زورانسری بیگواھیں مردم پوج ءَ دروگیں میڑاں کُشتگ اَنت نادُراھجاہ ءَ برتگ اَنت، اود ءَ کھول وتی مردمانی پجّار کنگ ءَ پد لاش دستیگ کتگ اَنت-

پوج ءُ نادُراھجاہ انتزامیہ نیمگ ءَ چہ یکو لاشانی پجّار ءِ دارگ، ناشناسیں کبرستاناں کل ءُ کسارت کنگ، کھول ءَ چہ منّینگ ءُ دستھت ءُ دگہ تُرسینگ وئیل دیم ءَ اَتکگ اَنت-