سوراب : زورانسری بیگواھیں مردمانی کھول ءَ سی پیک دگ سر ءَ سیمی روچ ءَ ھم نندانک برجاہ، دگہ کھولاں بھر زرتگ

زورانسری بیگواھیں مردمانی کھول ءُ بلوچ یکجھتی کمیٹی ءِ نندانک سوراب سی پیک دگ سر ءَ سیمی روچ ءَ ھم برجاہ ءَ اِنت، دگہ دو بیگواھیں مردمانی کھول زھرشانی ءَ ھوار بیتگ اَنت، بیگواھیں مردمانی یل کنائینگ ءَ تاں زھرشانی برجاہ دارگ جار جتگ-

سوراب نندانک سیمی روچ ءَ دگہ دو کھول بیگواھیں فضل بلوچ ءُ نصراللہ بلوچ ءِ کھول ھم نندانکجاہ ءَ سر بیتگ اَنت وتی مردمانی یل کنائینگ ھاتر ءَ زھرشانی ءَ ھوار بیتگ اَنت- اے وھد ءَ نندانک ءَ ساڑی سرجم دوازدہ بیگواھیں ورنایانی کھول اے زھرشانی ءِ بھر اَنت-

سیمی روچ ءَ نندانک ءِ سبب ءَ کراچی شال شھدگ ءُ سی پیک روٹ نیمگ ءَ گاڑیانی دراجیں لین لگّ اِتگ-

زانگ بہ بیت گوستگیں روچ ءَ واکدار ءَ کھول ءَ دو مردم ءِ یل کنائینگ ءِ دلجمی داتگ بلے کھول گوشتگ کہ زورانسری بیگواہ سرجمیں نُھیں مردم یل کنگ بہ بنت-

دومی نیمگ ءَ ھب ءَ زورانسری آوار جنی ءِ نندانک سیمی روچ ءَ برجاہ مروچی سُھب ءَ پولیس ءَ زھرشانی کنوکیں زالبول ءُ چُکانی سر ءَ تاکت کامرز کتگ-

پولیس ءَ زھرشانی کنوکانی سر ءَ تیرگواری ءَ ھوار لَٹ ءُ کُٹ ھم کتگ ءُ بیگواھیں مردمانی کھول ءُ بلوچ یکجھتی کمیٹی ءِ باسک دزگیر کتگ اَنت-

نندانک ءَ نشتگیں زھرشانی کنوکانی گوشگ اِنت کہ پیرزالیں زالبولاں ھوار نُھ مردم پولیس ءَ دزگیر کتگ ءُ ناشناسیں جاھے ءَ برتگ اَنت – پولیس لَٹ ءُ کُٹ ءَ اَبید کھول نندانک برجاہ ءَ اِنت-

ھمے وڑ مستونگ ءِ دمگ کردگاپ ءَ ھم دومی روچ ءَ زورانسری آوار جنی ءِ ھلاپ ءَ بُنجاھی شھدگ سر ءَ نندانک برجاہ-