زامران ءُ نوشکی ءَ زورگریں پاکستانی پوج ءُ پولیس سر ءَ بیتگیں اُرشانی زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں زامران ءُ نوشکی ءَ زورگریں پاکستانی پوج ءُ پولیس دو جتاجتائیں اُرشاں نشانگ کتگ اَنت-

جارکش ءَ گْوشتگ کہ بی ایل ایف ءِ اسنائپر ٹیکٹکل ٹولی ءَ ھژدہ فروری ءِ بیگاہ ءِ چار ءَ کیچ ءِ دمگ زامران جونکی تنک ءَ برجاھیں زورگریں پاکستانی پوج ءِ چوکی ءَ ڈن اوشتوکیں کارمند نشانگ کتگ اَنت چریشی ءِ آ جاہ پہ جاھی مرتگ-

جارکش ءَ گْوشتگ کہ اُرش ءَ پد زورگریں پاکستانی پوج ءَ سر ءُ دیم تُرندیں تیرگواری کتگ بلے سرمچار پہ سلامتی وتی مُھریں ھنداں سر بیتگ اَنت-

جارکش ءَ گْوشتگ کہ دومی کاروائی شانزدہ فروری بیگاہ ھپت ءَ مئے سرمچاراں نوشکی پولیس تھانہ دستی بمب اُرش ءِ نشانگ کتگ ، اے اُرش کڈنی ھساب ءَ پولیس تھانہ بُنجاھی دروازگ سر ءَ کتگ ءُ پہ زور جانی تاوانی ءَ چہ پھریز کتگ- آئی ءَ گْوشتگ ما اے اُرش ءِ پُشدر ءَ چہ نوشکی پولیس ءَ کڈن کن ایں کہ آ زورگریں پوج ءِ ھمراھداری ءَ مکنت-

جارکش ءَ گْوشتگ کہ بی ایل ایف اے دوئیں اُرشانی زمہ واری ءَ منّ اِیت ءُ زورگریں پوج ءِ سرجمی دراھگ ءَ تاں وتی اُرشاں برجاہ دارگ اِھد کنت-