ھب: زورانسری بیگواھیانی ھلاپ ءَ سیمی روچ ءَ نندانک برجاہ، گپ ءُ تران بے سوب

ھب چوکی ءَ زورانسری بیگواھیں مردمانی کھولانی نیمگ ءَ آیانی دوستیگیں مردمانی یل نہ کنگ ءِ ھلاپ ءَ زھرشانی برجاہ، چریشی ءِ سبب ءَ کراچی شال ءِ بنجاھی شھدگ گوستگیں سَے روچاں چہ بند انت ءُ ٹریفک ءِ روانی مھتل انت-

پاکستانی پوج ءِ دست ءَ زورانسری آوار جنگ بیتگیں دو برات جنید حمید ءُ یاسر حمید ءِ کھول ءِ ھواری ءَ چاکر بگٹی ءِ کھول گوستگیں سَے روچاں بھوانی ءِ ھند ءَ شھدگ ءِ سر ءَ نشتگ ءُ بند اش کتگ چریشی ءِ سبب ءَ کراچی شال، گوادر ءُ دگہ ھندانی زمینی راہ بند اَنت-

شھدگ ءِ بند بوگ ءِ سبب ءَ سدانی کچ ءَ گاڑی مھتل انت ءُ انتزامیہ ءِ گون ءَ گپ ءُ تران بے سوب بیتگ-

گوستگیں شپ ءَ دمگی انتزامیہ ءُ زھرشانی کنوکانی میان ءَ سیمی بر ءِ گپ ءُ تران بے سوب بیتگ ءُ انتزامیہ ءِ رد ءَ چاکر بگٹی ادارھانی گور ءَ بندیگ انت کھول ءِ گون ءَ گپ ءُ تران ءَ پرمایگ بیت اِنت-

گوستگیں شپ ءَ ایس پی ھب رانا پنام ءِ عثمان، اے ڈی سی ھب، چیئرمین ایم سی ھب بابو فیض شیخ، نامینتگیں وائس چیئرمین ایم سی ھب عظیم سیاں، ایس ایچ او ھب سٹی قادر شیخ، ایس ایچ او بیروٹ گل ھسن، ایس ایچ او عبدالجبار رونجھو ءُ دگراں زھرشانی کنوکانی گون ءَ گپ ءُ تران آسری ءَ نہ بیتگ-

گپ ءُ تران کنوک زھرشانی کنوکاں سدک کنگ ءَ بے سوب بیتگ انت زھرشانی کنوکاں گوشتگ چاکر بگٹی ءِ نام ءَ درج کتگیں ایف آئی آر ءَ آیاں پیش بہ کن ات بلے آیاں ایف آئی آر پیش نہ کتگ-

کھول ءَ گوشتگ اگاں آئی ءَ جرمے کتگ آمیدگساں پیش کنگ بہ بیت ءُ دیم ءَ آرگ بہ بیت اِنت-

زھرشانی کنوکانی لیکہ انت آیانی زھرشانی داں مردمانی یل کنگ ءَ برجاہ بیت اِنت-