بلوچستان ءِ جتاجتائیں دمگاں چہ دگہ چار مردم آوار جنی ءِ کیس نکش کنگ بیتگ-
گیشیں ھالانی رِد ءَ سی جنوری دوھزار بیست پنچ ءَ محمد اقبال ء حاجی میر خان ءُ ذاکر یعقوب جھمنند کواڈسک ھُزدار پاکستانی پوج ءَ پنجگور بائی پاس سر ءَ پوج ءِ چیک پوسٹ ءَ چہ درکانودی آوار جنگ ءَ پد بیگواہ کتگ-
اے دوئیں مردم تیل باپاری ءَ چہ ھمگرنچ بیتگ اَنت ءُ وتی گاڑیاں چہ تیل برگ ءَ بیتگ اَنت- پوج ءَ تیل ءِ ھمراھی ءَ آیانی گاڑی ھم گپتگ اَنت-
ڈیرہ بگٹی ءِ تھسیل سوئی ءِ بگٹی کالونی ءَ بگو ء براھم بگٹی پوج ءِ کارمنداں روچ رھماں زورانسری بیگواہ کتگ-
ھمے وٹ بیست نُھ جنوری ءَ نصیر آباد ءِ دمگ چھتر ءَ شکلوں بگٹی ایف سی ءِ کارمنداں زورانسری بیگواہ کتگ-
دومی نیمگ ءَ چہ رکنی ءَ زورانسری بیگواہ بیتگیں بلوچی ازمکار ناڑی گلاب آجو بیتگ-
چہ نوشکی ءَ بیگواہ بیتگیں فٹبالر فیروز خان ء حاجی موسی خان بڑیچ چار ماہ ءَ پد یل کنگ بیتگ ءُ وتی لوگ غریب آباد ءَ سر بیتگ کہ آئی ءِ یل بیگ ءَ چہ کھول ءُ سیاداں شاتکانی ودی بیتگ-