انیسہ ء محمد بخش عاصم ءِ لوگ بانُک جھمنند تمپ کونشقلات ءَ بلوچ یکجھتی کمیٹی ءِ راھشونانی ھمراھی ءَ تربت پریس کلب ءَ پریس کانفرنس کنان ءَ گْوشتگ کہ آیانی لوگ سر ءَ ھمکروچ اُرشکار ءُ کھول ءَ سسّائی زوراکی نشانگ کنگ ءَ اَنت-
آئی ءَ گْوشتگ کہ مئے لوگ ءَ منی مات ءُ پتاں اَبید دگہ کس نیست، منی لوگ واجہ عاصم زورانسری آوار جنی ءَ پد درکانودی کُشتگ ءُ آئی ءِ لاش دور داتگ اَت، تاں ھما روچ ءَ ریاستی پوج، چیریں اداراہ ءُ آیانی دمگی کارمند ھمکروچ مئے لوگ ءَ کاینت، مئے سُر ءُ پُراں نگاہ داشتگ اِنت مئے زندمان ھرام اش کتگ-
آئی ءَ گْوشتگ کہ ریاستی زوراکی ءَ چہ ھچ لوگ مُھر نہ اِنت، بلوچستان ءَ زورانسری آوار جنی، درکانودی کوش، پوجی لشکر کشی ءُ زوراکی ھمکروچی جوڑ بیتگ، ھروچ روچ رھماں یا شپ ءِ تھاروکی ءَ پوج تچکی ءَ وتی جوڑ کتگیں سلاہ بندیں ٹولیانی دست ءَ بے میاریں بلوچانی لوگاں پُتر اَنت، تیرگواری کن اَنت ءُ مردماں جتاجتائیں دروشم ءَ تُرسین اَنت-
آئی ءَ گْوشتگ کہ پوج ءُ سلاہ بندیں ڈیتھ اسکواڈ ءِ کارمند یکشل ءَ جتاجتائیں دروشماں چہ سک دلسیاہ کنگ ءَ اَنت اے زوراکی ءِ دراجکشیں کسّہ ءَ کہ ما یکشل ءَ اوپار کنگ ءَ ایں کونشقلات ءَ برجاھیں مئے لوگ دو رند ءَ پُلّگ ءَ پد مانداشتگ- یکرندے پُل آباد ءَ منی برات ءِ وسرک لوگ مانداشتگ گوستگیں سال ءَ سے رند ءَ مئے لوگانی سر ءَ بیڑبرتگ لوگانی دروازگ ءُ درانی سر ءَ تیرگواری کتگ آ پروشتگ اَنت، لوگ ءَ ساڑی ایں مال ءُ دلوت ءُ گرانبھائیں سامان دُز اِتگ اَنت-
آئی ءَ گْوشتگ کہ مئے لوگ ءَ منی پت ءُ مات ءَ اَبید ھچ کس نیست، منی لوگ واجہ شھید عاصم زورانسری آوار جنی ءَ پد درکانودی کُشتگ ءُ آئی ءِ لاش دور داتگ، تاں ھما روچ ءَ پوج، چیریں ادارہ ءُ آیانی دمگی سلاہ بند ھر روچ مئے لوگ ءَ کاینت، مئے سُر ءُ پُرانی سر ءَ نگاہ اش داشتگ، مئے زندمان ھرام اش کتگ- گوستگیں شپ ءَ پد ءَ مئے لوگانی سر ءَ اُرش ءِ کتگ دروازگ ءُ در پُروشتگ اَنت ءُ اے رندے لوگانی تہ ءَ ھینڈ گرنیڈ چگل داتگ پولیس ءَ اے اُرش ءِ ایف آئی آر نکش کتگ ءُ پٹ پول ءِ کنگ دلجمہ داتگ-
آئی ءَ گوں واکدار ءَ دزبندی کتگ مئے سر ءَ بے سبب ءَ زُلم ءُ زوراکی ءِ درچ ءَ بند بہ کن اِت ءُ ما بلوچ راج ءَ چہ دزبندی کن ایں کہ آ اے زُلم ءُ زوراکی ءِ ھلاپ ءَ توار چست کنگ ءَ مئے ھمراھداری ءَ بہ کن اَنت-