چاگی، ھب چوکی : دفاع بلوچ اقدار ءِ رِد ءَ زھرشانی ءُ روانک برجاہ

بلوچ یکجھتی کمیٹی ءِ چیردستی ءَ دفاع بلوچ اقدار ” ءِ نام ءَ بلوچستان ءِ بازیں ھند ءُ دمگاں سرپدی ءُ زھرشانی روانکانی درچ برجاہ انت –

بلوچ یکجھتی کمیٹی (حب زون) ءِ نیمگ ءَ کراچی ءِ دمگ لیاری ءَ پولیس ءِ کریک ڈاؤن ءُ ملیر روانک ءَ بھر زوروکیں دمگی مردمانی نام ءَ دروگیں ارزی ءُ دزگیری ءِ بگیری ءَ ھب چوکی ءَ روانکے کشگ بوتگ ءُ زھرشانی کنگ بوتگ –

روانک ءَ ھواریں درنگاز کنوک مزنیں کچے ءَ اتکگ ءُ ھب پریس کلب ءِ دیم ءَ مُچ بوتگ انت کہ اودا مدامی وڈا واکداراں زھرشانی ءِ بے سوب کنگے جھد کتگ ءُ بُچانی گاڑی ءُ فائر برگیڈ گاڑی راھے سر ءَ آؤرتگ ءُ اشتارینتگ انت -.

بلے پدا ھم درنگاز کنوکاں درسیں اڈاند سرگوز کتگ ءُ روانک سوبین کتگ کہ شھر ءِ بازیں دگانی سر ءَ اوگام جتگ ءُ پریس کلب ءِ دیم ءَ مُچ بوتگ نندانک جتگ –

ھمے وھد ءَ مھلوک ءَ گوں تران کنان ءَ بلوچ یکجھتی کمیٹی ھب زون ءِ آرگنائزر ءُ بیگواھیں راشد حسین ءِ گھار زتک ماہ زیب بلوچ ءُ چہ کراچی ءَ بالاچ بلوچ ءَ گوں مھلوک ءَ لوٹ کتگ کہ بیست ءُ پنچ جنوری ءِ ماں ڈالبندین ءَ بؤکیں راجی مُچی ءَ بھر بہ زور انت –

ھمے وڈ بلوچ یکجھتی کمیٹی چاگی زون نیمگ ءَ ھم ڈالبندین ءَ “دفاع بلوچ اقدار” نام ءَ یک روانک ءِ کش اِتگ کہ عرب مسیت ءَ بندات بوتگ ءُ اوگام جنان ءَ قاسم خان پٹ سر بوتگ انت –

روانک ءَ بنجاھی رھشون ڈاکٹر صبیحہ بلوچ ھم ھوار بوتگ ءُ درنگاز کنوکاں چہ مھلوک ءَ لوٹ کتگ کہ مزنیں کچے ےَ ڈالبندین ءَ سر بہ بنت ءُ زرمبشت ءِ بھر جوڈ بہ باں –

زانگ بہ بیت لھتے روچ ساری کراچی دمگ لیاری ءَ پولیس ءَ بلوچ یکجھتی کمیٹی ءِ سر ءَ کریک ڈاؤن کتگ ءُ بازیں مردین ءُ زالبولے دزگیر کتگ کہ آئی ءِ بگیری ءَ بلوچ یکجھتی کمیٹی ءَ ” دفاع بلوچ اقدار” نام ءَ زھرشانی زرمبشت ءِ جار جتگ بوتگ –