لیاری وئیل ءَ پد سرجمیں بلوچستان ءَ ” دفاعِ بلوچ اقدار” نام ءَ زھرشانی کنگ بیت – بی وائی سی

بلوچ یکجھتی کمیٹی ءِ بنجاھی جارکش ءَ وتی شنگ کرتگیں درشانے ءِ تہ ءَ گوشتگ کہ گوستگیں روچ ءَ ڈالبندین ءَ بؤکیں راجی مُچی ءِ ھاتر ءَ ماں لیاری ءَ ایمنیں مچی ءِ برجم دارگ بوتگ، بلے مدامی ءِ وڑ ءَ ریاست ءِ پاکستان ءُ پاکستان پیپلز پاٹی ءِ سرکار ءَ پرایمنیں زھرشانی مُچی ءِ سر ءَ بیڑ بُرتگ ءُ بلوچ زالبول، کماش ءُ ورنا سک باز لٹ شاپ کتگ انت ءُ بلوچ یکجھتی کمیٹی ءِ بنجاھی رھشون لالا وھاب بلوچ، سمی دین بلوچ ءَ ھوار مئے بازیں سنگتے دزگیر کتگ انت – بلوچ زالبول شش ھپت ادار ءَ گیش گار کتگ انت ءُ لٹ شاپ کنگ ءَ پد یل داتگ انت بلے لالا وھاب بلوچ ءَ ھوار ایندگہ سنگت انگت بیگواہ انت ءُ آیانی ھچ ھال نیست ءُ مارا ھچ وڑیں سرپدی دیگ بوگ ءَ نہ انت –

جارکش ءَ گوشتگ کہ لیاری مچی ءِ سر ءَ ریاست ءِ پاکستان ءُ پیپلز پاٹی سرکار ءِ اُرش بلوچ راج ءِ بگیری ءَ وتی نپرت ءِ درشانی انت ءُ بلوچ زالبولانی سریگانی سرچنگ تچکی ءَ بلوچ راجی مڑاہ ءِ سر ءَ اُرش انت – بلوچ راج ریاست ء پاکستان ءُ پیپلز پاٹی ءِ کرتوت ءُ زوراکیاں وتی راجدپتر ءَ نبیس ایت ءُ اشی ءَ وتی راجی زانشت ءِ بھرے جوڑ کنت ءُ یک منگھیں راجی گھگیری ءِ تہ ءَ بدل کنت – آئی ءَ گوشتگ کہ بلوچ زالبول ءُ کماش بے وارس نہ انت بلکیں آیانی پُشت ءَ سرجمیں بلوچ راج اوشتوک انت – بلوچ راج ءَ گوستگیں ھپتاد ءُ ھپت سال انت اے وڑیں زلم ءُ زوراکیانی بگیری ءَ گھگیری کنان ءُ پیداک انت اے وڑیں سِلیں کار مئے راجی گھگیری زرمبشت ءَ گیشتر مھکم کنت –

جارکش ءَ گوشتگ کہ ریاست پاکستان ڈالبندین ءَ بؤکیں بلوچ چکچینی ءِ یادگاری روچ ءِ درگت ءِ بلوچ راجی مچی ءِ بے سوب کنگے ھاتر ءَ وتی درسیں زور ءَ جنگ ءَ انت – زیکیں لیاری وئیل ءَ ابید مستونگ ءُ نسیر آباد ءَ پُرایمنیں راجی مُچیانی برجم کنگ ءَ پہ بلوچ یکجھتی ءِ سروک ڈاکٹر ماھرنگ بلوچ، بنجاھی رھشون صبغت اللہ شاہ جی ءُ ایندگہ سنگتانی بگیری ءَ ارزی نبشتہ کنگ بوتگ ءُ ھر ھند ءُ دمگاں مراگشانی بے سوب کنگ ءِ ھاتر ءَ نیٹ ءُ دامگ بند کنگ بوگ ءَ انت ءُ اڈاند پیداک کنگ بوگ ءَ انت بلے ریاست ءِ درسیں سازش ءُ پندل بے سوب بوان انت –

درشان ءِ گڈسر ءَ جارکش ءَ گوشتگ کہ زیکیں روچ ءَ لیاری ءِ بوتگیں وئیل ریاستی ناشرکاری ءُ رستری درشان کنت – ھمے رستری ءُ ناشرکاری ءِ بگیری ءَ بلوچ یکجھتی کیمٹی باندا دوشمبے ءِ روچ ءَ سرجمیں بلوچستان ءَ “دفاعِ بلوچ اقدار” ءِ نام ءَ زھرشانیانی درچ ءِ بندات کنگ بیت – ڈالبندین ءَ راجی مچی ءِ ھاتر ءَ برجاھیں سرپدی مھم ءُ زھرشانی ھواری ءَ سرجمیں بلوچستان ءَ کنگ بنت – بلوچ یکجھتی کمیٹی ءِ باسک ءُ بلوچ راج ڈالبندین ءَ راجی مُچی ءِ چن ءُ لانچانی درگت ءَ وتی کار ءَ گیش بہ کن انت –