ھب : بیگواھیں مردمانی کھول شُدکشیں ھڑتالی بُنجل آسر، زھرشانی ءُ روانک

بلوچستان ءِ باپاری شھر ھب چوکی ءَ بیگواھیں مردمانی کھول نیمگ ءَ چہ برجاھیں سے روچی شُدکشیں ھڑتالی بُنجل مروچی آسر بیتگ- بُنجل ءِ گُڈی روچ ءَ کھول ءَ ھب پریس کلب ءَ چہ یک زھرشانی روانک کش اِتگ، کہ شھر ءِ جتاجتائیں شھدگانی چہ گوزان واتر پریس کلب دیم ءَ ھلاس بیتگ-

اے شُدکشیں ھڑتالی بُنجل زورانسری آوار جنگ بیتگیں دوئیں برات جنید حمید ءُ یاسر حمید ءِ کھول نیمگ ءَ چہ جنگ بیتگ، کہ گوستگیں سال اکتوبر ءَ چہ ھب چوکی ءُ کلات ءَ پاکستانی پوج ءِ دست ءَ زورانسری بیگواہ کتگ-

بُنجل ءَ دگہ بیگواھیں مردمانی کھولاں اَبید بلوچ یکجھتی کمیٹی باسک، سیاسی باسک ءُ شھریاں ھم بھر زرتگ-

بُنجل ءَ ھوار دگہ بیگواھیِ مردمانی کھولانی تہ ءَ بلوچ باسک راشد حسین ءِ مات، بی ایس او آزاد ءِ نودربریں راھشون شبیر بلوچ ءِ گوھار سیماء بلوچ، بیگواھیں چاکر خان بگٹی ءُ نوروز اسلام ءِ کھول، ءُ نصیر جان ءِ مات ءَ ھوار پنجگور ءِ جھمنند زھیر بلوچ ءِ کھول مردم ھوار بیتگ اَنت-

روانک ھوار بیگواھیں یاسر ءُ جنید حمید ءِ گوھار یاسمین ءَ تران کنان ءَ گْوشتگ کہ، منی برات سے ماہ ءَ چہ ریاستی ادارھانی درکانودی آزارجاہ ءَ اِنت، ءُ مارا تنی وھدے گوشگ نہ بیتگ کہ اشانی سر ءَ چی بھتام یا کہ کجام جرم ءِ کتگ-

یاسمین حمید ءَ گْوشتگ کہ منی برات مھنتی اَنت- اشاں ھچ وڑیں سیاسی یا درکانودی پُرکاریاں چہ سیادی نیست – آیاں زورانسری بیگواہ کنگ آئین ءُ کانود ءِ ھلاپ ورزی اِنت-

شبیر بلوچ ءِ گْوھار سیماء بلوچ ءَ وتی تران ءِ تہ ءَ گْوشتگ کہ دوھزار شانزدہ ءَ چہ وتی براتانی یل کنائینگ ھاتر ءَ زھرشانی کنگ ءَ آں ھر روچ پریس کلبانی ڈن ءَ زھرشانی کنگ ھمگروچی گپے جوڑ بیتگ، بلے آمیدگس، کانود، ءُ ریاستی ادارہ وتی وجود ءُ کرد شموشتگ ئِے-

سیماء بلوچ ءَ گْوشتگ کہ مئے جُستانی پسّھانی دیوک ھچ کس نیست – ما تھنا وتی دوستناکانی زندمان ءُ آجوئی ءَ لوٹگ ءَ ایں، پرچا اے ھم جرمے؟

راشد حسین ءِ مات ءَ اے درگت ءَ گوشتگ کہ شش سال سرجم بیگ ءَ اِنت، بلے آمیدگس، کمیشنز ءُ جے آئی ٹیز ءَ مارا ھچبر انساپ نداتگ من وتی چُک ءِ یل کنائینگ ھاتر ءَ ھنی ھم زھرشانی کنگ ءَ لاچاراں – پرچا یک ماتے وتی چُک ھاتر ءَ انساپ لوٹگ ھم جرمے جوڑ بیتگ-

بلوچ یکجھتی کمیٹی ءِ ھب ءُ کراچی ءَ چہ آؤکیں باسکاں ھم زھرشانی ءَ تران کتگ-

آیانی گوشگ اِنت کہ اے یک گمے کہ بلوچستان ءَ ھرچ دومی روچ ءَ کسے ناں کسے ءِ کھول زورانسری آوار جنی ءِ دیمپانی کنگ کپ اِیت ھب چوکی ءَ زھرشانی کنوکیں کھولانی کسہ مئے واستا نوک نہ اَنت اے درچ دھکاں چہ برجاہ ءَ اِنت، بلے ریاستی ادارھانی بے حسی روچ پہ روچ گیش بوان اِنت-

آیاں گْوشتگ کہ ما لوٹ کن ایں کہ اے بیگواھی مردماں زوت دیم ءَ بیار اِت ءُ زورانسری آوار جنی ءِ اے درانسانی کار ءَ بدار اِت-

آیاں گوشتگ کہ ریاستی ادارہ ءُ آمیدگس زمہ واری یات بہ کن اَنت کہ بلوچ راج وتی دوستناکاں یل کنائینگ ھاتر ءَ کجام ھد ءَ چہ شت کن اَنت- اگاں مروچی ھب چوکی ءِ اے کھول اد ءَ اوشتاتگ اَنت، گُڑا باندا بلوچستان ءِ ھرچ کُنڈ ءَ چہ مردم اوشت اَنت-

روانک ءَ ھوار دگہ بیگواھیں مردمانی کھول ھیال ءُ لیکہ درشان کنان ءَ گْوشتگ کہ ما ریاست ءَ چہ لوٹ کن ایں کہ مئے دوستناکاں آمیدگس ءَ پیش بہ کن اِت- اگاں آیانی سر ءَ چُشیں بھتامے ھست گُڑا کانود رِد ءَ کاروائی بہ کن اِت، بلے چو زورانسری بیگواہ کنگ مارا درد ءُ رنجانی تہ ءَ کنگ کجے انساپ اِنت؟

زھرشانی کنوکاں ھکومت ءَ چہ زورانسری آوار جنی ءِ ھلاس کنگ ءُ بیگواھیں مردماں زوت یل کنگ لوٹ کتگ آیانی گْوشگ اِنت اے زھرشانی تھنا بندات اِنت ، اگاں آیانی دوستناکاں یل نہ کنگ نہ بیت اَنت گُڑا زھرشانی ءَ دراجکش کن ایں سرجمیں بلوچستان ءَ تلان کن ایں-