بلوچ وومن فورم دیروغازیخان ءِ زون ٹاہینغ بیثوزونل آرگنائزر فوزیه بلوچ ءُ زونل ڈپٹی آرگنائزر مبشره بلوچ گچین کنگ بیثغ آں

بلوچ زالبول کہ ہرہندے نشتغاں آھاں قومی سیاست ءِ زمہ واری پیلو کنغی انت – بلوچ وومن فورم

بلوچ وومن فورم دیروغازیخان زون ءِ آرگنائزنگ باڈی دیوان بنجاهی آرگنائزر ڈاکٹر شلی بلوچ ءِ سروکی ءَ برجم دارگ بیثغ۔

دیوان ءِ بن گپ بنجاهی سرکولر،گل کاری،هندی ءُ میان اُستمانی سیاسی جاورهال ءُ آؤکیں گام گیج بیثغ آں۔

بلوچستان یا ہر ہماں ہنداں کہ بلوچ نشتغ آں اوزا سیاست ء ھراویں کارے سمجغ بیث، او اے پندل سرکار ء جوڈینت تاکہ بلوچ مخلوق شہ وثی حق حقوق آں بے سما بیت، او پہ وثی راجی حق آں دیما میاہاں، ہمے پندل بلوچستان ءِ کُنڈ کُنڈ ءَ گندغا کیث، باز ہند شہ ہمے پندل ء باز اثر مند بیثغ آں کہ دیرو ہمیشانی نیاما شہ یک ءِ۔ دیرو ءِ مخلوق ء سرا ہروختا ہمے ٹوک کنغ بیث کہ مردمانی بدحالی ءِ زمہ وار ہمے ہندانی قبائلی نظام او سڑدار آں۔ دومی پلوا حقیقت اے ڈولا نہ ایں، سرکار ءَ بلوچ مخلوق شہ سیاست ء دور داررغ واستہ ہمے ڈولیں گالوار دیما آڑتغوں بلے مخلوق پہ وثی راجی حق آں پاذ میاہاں، مرشی بلوچ وومن فورم ءِ نیمغ ء شہ دیرو زون جوڈینغ بیثو، اے وث گواہی دنت کہ بلوچ مخلوق مرشی پہ وثی سیاسی جدوجہد ء ہرہندا پاذ مناغیں۔ ما دیرو مخلوق ء ہمے کلوہ دیغ لوٹیں کہ پہ قومی جدوجہد پاذ بیائے، قومی زمہ واریانی پیلو کنغ ءَ وث او وثی لوغ ءِ زال و چُک آں سیاسی جدوجہد نیاما آوار کنے۔ مرشی دیرو ءِ باسمائیں او شعوریافتہ ایں بلوچ زالبول آں قومی زمہ واری سمجث او بلوچ وومن فورم بھر بیثغ آں۔ ما امید داریں کہ ہمے سنگت دیرو ءِ سیاسی جدوجہد اندار وثی کڑدار ء پیلو کناں او بلوچ مخلوق ءِ سیاسی تربیت ء برجم داراں۔ دیروے بلوچ زالبول آنی سیاسی جدوجہد ء آوار بیغ نہ صرف دیرو بلکیں بلوچستان ءِ کُل مخلوق ءِ وش بختی انت، ما امید کنیں کہ سنگتانی جدوجہد الم سوبمند بیث او سنگت پہ بلوچ وومن فورم او راجی زامہ واری آں پیلو کنان بلوچستان ءِ دومی ہندانی زالبول آنی واستہ کاراں آسان کناں

آیاں گوشت آؤکیں گام گیج ءَ بلوچ وومن فورم دیروغازیخان زون ٹاهینغ بیثو فوزیه بلوچ زونل آرگنائزر، مبشره بلوچ زونل ڈپٹی آرگنائزر ءُ گوهر بلوچ،شاری بلوچ ءُ سمُل بلوچ آرگنائزنگ کمیٹی ءِباسک گچین کنگ بیثغ آں۔