تربت : بلوچ چُکچینی ءُ زورانسری آوار جنی ءِ ھلاپ ءَ برجاھیں نندانک ھلاس

دمگی انتزامیہ نیمگ ءَ چہ اسسٹنٹ کمشنر تربت محمد خان بلوچ ءِ سروکی ءَ شھید فدا چوک سر ءَ ھشت روچاں چہ برجاھیں نندانک ءَ نشتگیں زھرشانی کنوکانی گوم ءَ گپ دیوان سوبمند بیتگ چریشی ءَ پد ظریف عمر ءُ نوید حمید ءِ کھول ءَ نندانک ءِ ھلاس کنگ جار جتگ-

نندانکجاہ ءَ گپ دیوان واستا کیچ بار ایسوسی ایشن ءُ مکران بار ایسوسی ایشن ءَ کرد پیلو کتگ، سنیئریں وکیلاں چہ محراب خان گچکی ایڈووکیٹ، مجید شاہ ایڈووکیٹ ءُ جاڈین دشتی ایڈووکیٹ ءَ گپ دیوانی کمیٹی ءَ بھر زرتگ وھدے کہ اسسٹنٹ کمشنر تربت ءَ ڈپٹی کمشنر کیچ ءِ نیمگ ءَ چہ کھول ءِ باسکانی لوٹانی منگ ءُ اشانی سر ءَ زوت گامگیج زیرگ ءِ دلجمی داتگ-

گپ دیوان ءَ دمگی انتزامیہ ءَ ظریف عمر ءِ کھول ءِ تُرسینگ ھلاس، بیگواھیں مردمانی یک لیسٹے دیگ بیتگ کہ آیانی یل کنگ ءِ لوٹ کنگ بوتگ ءُ ظریف عمر ءُ نوید حمید کوش ءَ ھواریں مردمانی ھلاپ ءَ کاروائی ءِ واستا گوشگ بیتگ کہ آیاں دلجمی داتگ ءُ گْوشتگ کہ بیگواھیں مردمانی لیسٹ ءَ چہ لھتے مردم بیست چار کلاکانی تہ ءَ یل کنگ بنت وھدے کپ آ دگہ مردم ھم یل کنگ بنت-

اے میان ءَ ظریف عمر ءِ گھار ءُ وکیلاں یکجاھی پریس کانفرنس ءَ دمگی انتزامیہ ءَ ٹاھانی پاسداری دلجمی دیگ ءَ زور داتگ ءُ کڈن کتگ اگاں آیانی لوٹ سرجم کنگ نہ بیت اَنت گُڑ آ دوبر وتی نندانک ءَ ھمے چوک سر ءَ بندات کن ایں-

ھمے وڑ ڈپٹی کمشنر کیچ اسماعیل ابراھیم ءِ گوشگ پد ءَ اسسٹنٹ کمشنر تربت محمد جان بلوچ ءِ سروکی ءَ زمان جان ءُ ابوالحسن ءِ کھول ءَ دمگی انتزامیہ ءَ دلجمی دیگ ءَ پد سی پیک شھدگ ھوشاپ زیرو پوائنٹ سر ءَ نندانک ھلاس کنگ جار جتگ-

اسسٹنٹ کمشنر تربت محمد جان بلوچ ءَ زمان جان ءُ ابوالحسن کھول ءِ سرجمیں لوٹ منّ اِتگ اَنت وھدے کہ دزگیریں زمان جان ءُ ابوالحسن ءِ کھول ءَ چہ گپ دیوان ھم کنگ بیتگ کہ آئی ءِ کھول ءَ راست کتگ-

کھول ءَ لوٹاں یکشل ءَ ترسینگ ھلاس کنگ، زمان جان ءُ ابوالحسن ءِ زورانسری آوار جنی ءَ ھمگرنچیں مردمانی ھلاپ ءَ ایف آئی آر نکش کنگ ءَ ھوار دگہ لوٹ پیش کتگ اَنت-