تربت ءِ اُرش: مرتگین ءُ زدگ بیتگین کارندہ ملٹری ھسپتال ءَ برگ بیتگ انت

تربت ءَ بلوچ لبریشن آرمی ءِ مجید بریگیڈ ءِ اُرش ءِ نشانگ ءَ پاکستانی پوج ءِ مرتگین ءُ زدگ بیتگیں کارندہ ملٹری ھسپتال ءَ برگ بیتگ انت-

ڈسٹرکٹ ھیڈ کوارٹر ھسپتال تربت ءِ میڈیکل سپر انٹنڈنٹ ڈاکٹر اھمد بلوچ ءَ بی بی سی ءَ گوں گپ کنان ءَ گوشتگ ھسپتال ءَ بمب تراک ءَ مرتگین ھچ مردم آرگ نہ بیتگ انت – آئی ءِ گوشگ ات کہ ھسپتال ءَ بس یازدہ زدگ بیتگیں مردم آرگ بیتگ انت کہ درمانی بیتگ انت-

آئی ءَ گوشتگ زدگ بیتگیں مردمانی توک ءَ ایس ایس پی سیریس کرائمز انوسیٹیگیشن ونگ شال زوھیب مھسن ءُ آئی ءِ برات ءُ چار زھگ ءُ ڈرائیور ھوار انت-

دمگی مردمانی رد ءَ زدگ ءُ مرتگین درستیں کارندہ تربت ایف سی ھیڈکوارٹر ءَ برگ بیتگ انت-

چم دیستگیں مردمانی رد ءَ تراک ءَ پد پورسز ءَ دمگ انگیر کتگ ءُ ایمبولنسزاں ھوار گاڑیانی روگ ءُ آیگ بندات بیتگ-

زانگ بہ بیت گوستگیں بیگاہ ءَ تربت شھر ھشت کلو میٹر دو بھمن ءِ ھند ءَ پاکستانی پوج ءَ کاروانانی دروشم ءَ بروکیں بس فدائی اُرش ءِ نشانگ بیتگ ات- نشانگ بیتگیں بس سرجم ءَ تباہ بیتگ ءُ تراک پھازوکیں کارندھانی گاڑیاں ھم تاوان رس اتگ-

بلوچ لبریشن آرمی ءَ اُرش ءِ زمہ واری من اتگ –

بی ایل اے ءِ جارکش جیئند بلوچ ءَ رسانکدران دیم داتگیں درشان ءَ گوشتگ ات کہ گل ءِ فدائی یونٹ مجید بریگیڈ ءَ پاکستانی پوج ءِ سر ءَ وتکش اُرش کتگ چریشی ءِ آسر ءَ بازین کارندہ مرتگ ءُ زدگ بیتگ انت-