اوتھل یونیورسٹی ھاسٹل بندی ءِ ھلاپ ءَ نودربرانی نندانک، انتزامیہ ءُ ھکومتی پالیسیانی سر ءَ تُرندیں ایرجنی جنگ بیتگ-
اوتھل یونیورسٹی ءِ نودربراں مروچی یونیورسٹی انتظامیہ نیمگ ءَ چہ ھاسٹلانی بندی ءِ ھلاپ ءَ یونیورسٹی ءِ تہ ءَ یک روانکے کشگ بیتگ ءُ نودربراں زھرشانی کتگ، روانک ءِ میان ءَ نودربرانی دست ءَ پلے کارڈز چست کتگ بیتگ آیانی سر ءَ ھاسٹلانی بندی ءُ انتزامیہ ھلاپ ءَ ناراہ نکش بیتگ اَنت-
نودربراں یونیورسٹی ءِ بُنجاھی دروازگ دیم ءَ نندانک داتگ پریس کانفرنس کنان ءَ گْوشتگ کہ انتزامیہ ءَ ھاسٹل بند کتگ سرجمیں جنک ءُ بچکیں نودربر زورانسری در کتگ اَنت-
آیانی گْوشگ اِنت کہ بلوچستان ءِ جتاجتائیں زانشتی ادارھاں ھاسٹل بندی ءِ درچ برجاہ ءَ اِنت، کہ بولان میڈیکل کالج ءَ چہ بندات بیتگ بلوچستان یونیورسٹی، ھُزدار یونیورسٹی، ءُ نو اوتھل یونیورسٹی ءَ تاں سر بیتگ-
اِھوالکاراں گوں تران کنان ءَ نودربراں گْوشتگ کہ یونیورسٹی ءِ انتزامیہ ءُ بلوچستان ھکومت نوٹیفکیشن ءَ چہ زانشتی ادارھاں پوج ءَ کار اِیت ءُ آیاں پوجی بُنجلاں چہ مٹ کنگ ءَ اِنت اے گامگیج نودربراں زانت ءَ چہ زبھر کنگ پندل اِنت-
نودربراں دیمتر ءَ گْوشتگ کہ اوتھل یونیورسٹی ءَ پیسر ءَ چہ آسراتیانی کمی اِنت، ءُ نو ھاسٹلانی جوڑ کنگ بھانگ ءَ نودربراں زورانسری در پہ در کنگ ءَ اِنت، آیاں تُرس اِنت کہ جوڑ کنگ میان ءَ چیریں کیمرہ پٹ کنگ بیت، ھمے وڑ کہ بلوچستان یونیورسٹی ءَ بیتگ، اود ءَ نودربر تُرسنیگ ءُ آیانی سر ءَ نگاہ ایر کنگ بیتگ-
نودربراں بھتام جتگ کہ ریاستی زوراکی ءِ آسر ءَ اوتھل یونیورسٹی ءِ بازیں نودربر زورانسری آوار جنی ءِ نشانگ کنگ بیتگ اَنت وھدے نودربر وتی سنگتانی یل کنائینگ ھاتر ءَ زھرشانی کتگ گُڑا انتزامیہ ءَ بیھار داتگ ءُ زھرشانی ءِ ھلاس کنگ جُھد کتگ-
زھرشانی کنوکیں نودربراں گْوشتگ کہ اگاں جوڑ کنگ مول ءُ مراد اِنت گُڑا یونیورسٹی ءِ دگہ جیڑھانی سر ءَ ھم پرچا دلگوش دیگ بیگ ءَ نہ اِنت؟ کوھنیں ھاسٹل کہ گوں پُرشتگیں جاور ءَ اِنت، آئی جوڑ کنگ پرچا نہ بیتگ؟
نودربراں اے تُرس درشان کتگ کہ انتزامیہ جوڑ کنگ بھانگ ءَ نودربراں در پہ در کنگ ءِ پندل سازی کنگ ءَ اِنت-
نودربراں لوٹ کتگ کہ ھاسٹلانی بندی پیسلہ ءَ زوت واتر بزور اَنت، ءُ زانشتی ادارھاں پوج ءِ دزمانجنی ءَ چہ پلگار بہ کن اَنت نودربر وانگ ءَ برجاہ کت بہ کن اَنت-