پسنی : بولان کریم ءِ زورانسری آوار جنی ءَ دوازدہ سال سرجم، کھول ءُ شھریانی نیمگ ءَ چہ زھرشانی

چہ پسنی ءَ زورانسری بیگواہ دوستین بلوچ پنّام ءِ بولان کریم ءِ زورانسری آوار جنی ءَ دوازدہ سال سرجم بیگ ءَ کھول ءُ پسنی ءِ شھریاں پریس کلب ءَ چہ بگر جے ایس بینک ءَ تاں یک روانکے کش اِتگ-

روانک ءَ زالبول ءُ زھگ ھم ھوار بیتگ اَنت-

روانک ءَ ھمگرنچ زھرشانی کنوکانی دستاں پلے کارڈ ءُ بینرز بیتگ اَنت کہ آیانی سر ءَ بولان کریم ءَ ھوار دگہ زورانسری بیگواھیں مردمانی یل کنائینگ ناراہ نکش بیتگ اَنت-

زھرشانی ئیں روانک ءَ چہ تران کنان ءَ ترانکاراں گْوشتگ کہ بولان کریم ءَ بیگواھی ءَ مروچی دوازدہ سال سرجم بیتگ ءُ ھما چک کہ ھمے وھد ءَ چُک بیتگ اَنت آ نو ورنا اَنت بلے بولان کریم تاں انگت یل کنگ نہ بیتگ-

آیاں گْوشتگ کہ بولان کریم ءِ مات دوازدہ سال ءَ چہ ودار ءَ اِنت کدی آئی ءِ چُک یل بیت ءُ لوگ ءَ کئیت ءُ اے دوازدھیں سالاں آئی ءِ مات ءُ گْھاراں یک گم ءَ رنجیں زند گوازینتگ-

زھرشانی کنوکاں گوشتگ کہ ریاست سرجمیں بیگواھیں مردماں یل بکنت اگاں ناں آ ریاست ءِ گور ءَ نہ اَنت گُڑا آیاں یل بکنت-

زھرشانی کنوکاں گْوشتگ کہ بلوچستان ءَ ھمکروچ شھری ءُ نودربر بیگواہ بیگ ءَ اَنت کہ اے ڈیھ ءِ شھری اَنت آیانی شوھازگ کنگ ریاست ءِ زمہ واری اِنت مردم اگاں گناھگار اَنت گُڑا ریاست آیاں وتی جوڑ کتگیں آمیدگساں پیش بہ کنت بلے اے وڑ دوازدہ دوازدہ سالاں تاں نودربراں بیگواہ کنگ چہ آیاں آیانی زندمان ءِ وشیانی بچگر زُلم اِنت-

زھرشانی کنوکاں لوٹ کتگ کہ بولان کریم ءَ ھوار بلوچستان ءِ سرجمیں بیگواھیں مردماں یل بہ کن اِت-

ھمے وڑ گوادر ءِ جھمنندیں زورانسری بیگواہ نعمان اسحاق ءِ برات ءَ یک درشانے ءِ تہ ءَ گْوشتگ کہ ھپت نومبر دوھزار بیست چار ءَ چہ ڈوھوریہ تیاب دپ گوادر ءَ منی کستریں برات نعمان اسحاق زورانسری بیگواہ کتگ کہ انگت بیگواہ ءَ اِنت-

آئی ءَ گْوشتگ کہ ما یکو ریاستی ادارھانی دروازگ ٹُک اِتگ اَنت- ما ادارھاں چہ ھمے جُست کتگ کہ منی برات ءَ کجام جرم کتگ؟ اگاں واکی چہ آئی ءَ چُشیں جرمے کتگ گُڑا تو آئی ءَ وتی آمیدگس کہ شپ وھد ءَ ھم پچ بیت کنت، ھمے آمیدگساں منی برات ءَ پرچا پیش نہ کن اِت؟

آئی ءَ گْوشتگ کہ ما ریاست ءُ آئی ءِ چیریں ادارھاں چہ دزبندی کن ایں ءُ آیاں تاں بانداتگیں روچ ءَ وھد دے ایں – اگاں اے تاریک ءَ منی برات یل کنگ نہ بیت گُڑا ما دگانی سر ءَ کا ایں زھرشانی ءِ راہ ءَ گچین کن ایں کہ تئی واستا تُرندیں ءُ ناوشیں کارے-

آئی ءَ گوادر ءِ راج ءَ چہ دزبندی کتگ کہ باندا چہ ملا موسی موڈ ءَ سی پیک دگ ءَ تاں یک روانکے کشگ بیت اشی ءَ شریں جوانیں وڑے ءَ بھر بزور اِت ءُ زورانسری آوڑ جنی ءِ ھلاپ ءَ توار چست بہ کن اِت-