ءِ وتن بانک کریمہ ءِ چارمی سالروچ ءِ درگت ءَ آواران ءُ کولواہ ءِ جِتا جِتائیں دمگاں گوں سوبمندی ءَ بی ڈبلیو ایف ءِ نیمگ ءَ لس مھلوک ءِ مُچی برجم دارگ بوتگ ءُ لس مھلوک ءَ مزنیں کساسے ءَ بھر زُرت ءُ بانک کریمہ دروت ندر کُت۔ بلوچ وومن فورم
بلوچ وومن فورم :چہ بلوچ وومن فورم ءِ نیمگ ءَ بانک کریمہ بلوچ ءِ چارمی سالروچ ءِ درگت ءَ آواران ءُ کولواہ ءِ جتائیں دمگاں لس مھلوک ءِ مُچی گوں سوبمندی ءَ برجم دارگ بوتگ اَنت ، اے میتگانی تہ ءَ تیرتیج، مالار، ڈنڈار ءُ بَلور ھوار اِت اَنت، آواران ءُ کولواہ ھما ھند ءُ میتگ اَنت کہ ادا بانک کریمہ ءُ ایندگہ سیاسی جہدکاراں وتی شپ ءُ روچ پہ سیاسی چست ءُ ایرانی تہ ءَ گوازینتگ اَنت، آ مُدام بلوچ مھلوک ءِ یک جاہ کنگ ءِ جھد ءَ کنگ ءَ اِت اَنت۔ بانک ھما ھند ءُ میتگاں شُتگ کہ اودا زند ءِ گوازینگ ءِ ھچ آسراتی نہ بوتگ ءُ ھما ھلک ءُ دمگاں وتارا سر کُتگ کہ اودا پہ روگ ءَ راہ ءُ در نہ بوتگ ، بانک مُدام سپر کنان اَت ءُ پند جنگ ءَ اَت آئی ءِ ھمت ءُ جوزگ انچو مھکم اَت کہ وھد ءِ ھچ وڑیں زوراکی ءَ بانک پروش دات نہ کُت ،بانک ءَ وتی ھمپگریں سنگتانی جون دیستگ اِت اَنت ، وتی سنگتانی زندانی بوگ دیستگ اَت، لوگ مردمانی جون بانک ءَ را سوگات کنگ بنت بلے آ چو باتیل ءِ کوہ ءَ تمرد اَت ، بانک گوش ایت کہ منی واھشت بوتگ من یک آرٹسٹے یا سائیکولوجیسٹے بہ باں بلے من یک انچیں زمین ءِ سرا چماں پچ کتگاں انچیں جاور ھالانی تہ ءَ زند گوازینگءَ آں کہ من چہ اے چیزاں گِستا بوت نہ کناں منی واب ءَ چہ گیش اے جھد ازرشت داریت ، بانک وتی زند ءِ ھمک واھشتاں گُٹگیر کنت ءُ ھمک آسراتی ءَ آس دنت ءُ وتی آسودگیں زند ءَ یل کنت یک انچیں راہ ءِ گچین کنت کہ آ راہ ءِ تہ ءَ ابید ءِ مرگ دگہ ھچ نیست۔ اے دمگاں ریاستی زلم ءُ زوراکی انچو وتی گڈی آسر ءَ سر اَت ،مردم ترس ءُ بیم ءِ آماچ اِت اَنت ، اینچو زلم ءُ زوراکیاں ابید ھم اود ءِ مردم در کپتگ اِت اَنت ءُ اے پروگرامانی تہ ءَ یک شوکیں رنگے ءَ آیاں بھر زرت ءُ پروگرام سوبمند کُت اَنت۔
تیرتیج آواران بانک ءِ چارُمی سالروچ ءِ درگت ءَ اولی مُچی تیرتیج آواران ءَ برجم دارگ بوت کہ اے پروگرام ءِ بندات چہ راجی سوت ءَ بوت ءُ پروگرام ءِ تہ ءَ گُشتانک، بانک ءِ زند ءِ سرا ٹیبلو ءُ اے دگہ بھر ھوار اِت اَنت ،گُشتانک ءِ تہ ءَ بلوچ وومن فورم ءِ سروک ڈاکٹر شلی بلوچ ، بلوچ وومن فورم ءِ بُنجاھی پتر ءِ باسک زکیہ بلوچ ، مھرُک بلوچ ءُ زرینہ بلوچ تران کُت۔
آواران تیرتیج ءَ بلوچ وومن فورم ءِ سروک ڈاکٹر شلی بلوچ ءَ تران کنان ءَ گوشتگ مروچی من پھر کنگ ءَ آں کہ من انچیں سرزمینے ءِ سرا اوشتاتگ آں کہ ادا بانک کریمہ ءُ رزا جھانگیر ءِ وڑیں سیاسی راھشوناں شپ ءُ روچ گوں سیاسی چست ءُ ایراں گوْازینتگ آواران ءِ لس مھلوک ءِ سیاسی تربیت کُتگ ءُ دگہ بازیں انچیں گمنامیں سراں پہ گلزمین ءِ واستہ وتی ھید ءُ ھون ریتکگ اَنت وتی زاتی واھشت کُشتگ اَنت، بازیں انچیں گمنامیں سراں کہ ما چہ آیاں آشنا نہ ایں بلے مارا آیانی جُھد ءُ قربانیانی سرا پھر اِنت ءُ من ءَ یکین اِنت کہ اے سرزمین دیما ھم چشیں سر پیداک کنت کہ آ بلوچ ءِ زمین ، دودمان ءُ پجارءِ رکینگ ءِ ھاترا ھچ وڑیں قربانی دئیگ ءَ چک ءُ پد نہ بنت۔ڈاکٹر شلی بلوچ
آئی ءَ گوشت بلوچ چاگرد قبضہ گیریت ءِ آماچ اِنت، یک چاگردے ءِ قبضہ کنگ چہ دنیا ءِ گنتریں کاراں یکے، زوراکی تئی درستیں چیزانی سرا سان دور دنت تئی دود ءُ ربیدگ ءِ سرا اسر دور دنت چاگرد ءِ تہ ءَ مزھبی پرک ،زبانانی پرک ءُ نسلی پرک آرگ بیت ، ھر ھما چیز کہ مارا یکجاہ کناں یک راجے ءِ جوڑ کنگ ءِ ھما بنیادی ھشت ھست اَنت آ پروشگ بنت دانکہ ما شما یک راجے جوڑ مہ بہ ایں بلکہ بھر ءُ بانگ بہ بہ ایں ،پرچا کہ راج دوستی ءِ بنیاد یکجاھی اِنت ۔
بلوچ وومن فورم ءِ بنجاھی پتر ءِ باسک زکیہ بلوچ ءَ گوشت یک انچیں چاگردے ءِ کہ آ پہ بلوچ زالبولاں تنگ اِنت ءُ اے وڑیں چاگرد ءِ تہ ءَ یک عام جنکے در کپیت ءُ درستیں چیزانی دیمپان بیت ءُ بلوچ مھلوک ءَ را یک سیاسی لیکھے دنت آ کریمہ اِنت-
آئی ءَ گوشت بانک کریمہ ھما پگر اِنت ھما ھیال اِنت کہ ھمک بلوچ ءِ دل ءَ زندگ اِنت ، بانک گوں مھکمی ءَ وتی جھد ءَ برجاہ دار ایت گڑا دژمن بانک ءَ را برداشت نہ کنت ماں درانڈیھ ءَ شھید کنت، بلے زوراک چہ اے گپ ءَ آشنا نہ اَت کہ بانک کریمہ تھنا کریمہ نہ اَت آئی ءَ ھزاراں بانک کریمہ پیداک کُتگ اَت کہ مروچی آ جُنزان اَنت ۔ مھرُک بلوچ
پروگرام ءِ ھلاسی ءَ پد ڈاکٹر شلی بلوچ گوں لس مھلوک ءِ ھمبراھی ءَ نمیرانیں رزا جھانگیر (شے مرید) ءِ ادیرہ ءَ شُتگ ءُ رزا ءِ جھد ءَ را سلام پیش کنگ بوتگ۔
مالار آواران :بانک کریمہ ءِ یات ءَ چہ بلوچ وومن فورم ءِ نیمگ ءَ دومی پروگرام بلوچ وومن فورم ءِ سروک ڈاکٹر شلی بلوچ ءِ سروکی ءَ مالار آواران ءَ برجم دارگ بوت کہ اے پروگرام ءِ تہ ءَ مزنیں کچے ءَ مھلوک ءَ بھر زرت ، پروگرام ءِ بندات چہ راجی سوت ءَ بوت ءُ پدا ڈاکٹر شلی بلوچ ءُ مھرک بلوچ ءَ تران کُت ءُ گوشتگ کہ آواران ھما ھند اِنت کہ اے ھند چہ زند ءِ ھمک آسراتیاں زبھر اِنت ، بیست ءُ یکمی کرن ءَ اود ءِ مردمانی کرا زند ءِ گوازینگ ءِ ھچ آسراتی نیست اَنت۔
بلوچ گوستانک ءِ مھکم داروک، مھناز ءُ گراناز ءِ پگر ءَ دیما بروک، بانڈی ءِ وڑ ءَ براتانی رِد ءَ اوشتوک کریمہ اِنت۔کریمہ بوھگ ارزان نہ اِنت مزنیں درد ءُ پندے بُرّگ ءَ پد مردم ” مات “لُمّہ “جوڑ بنت پمیشکہ آ ماتے بُوتگ آئی ءَ ھُمک مردم ءِ گم پر بُوتگ۔
من تو ترسینگ باں دانکہ من تو وتی پت ءُ پیروکی جاہ آں یل بہ کن ایں بلے منا ءُ ترا اے ھلک ءُ میتگ یل ءَ کنگی نیاں ھمے زالمانی دیم ءَ اوشتگی اِنت ءُ جواب دیگی اِنت ، کہ اے منی سر ڈگار اِنت من ایش ءِ ھکیگیں وارس ایں ءُ بلوچ ایش ءِ وارس اِنت تو کئے کہ تو من ءَ ترسینے ، اے چیک پوسٹ کہ جوڑ کنگ بوتگ اَنت اے پہ مئے دلسیاہ کنگ ءِ واستا جوڑ کنگ بوتگ اَنت، تو کئے کہ من ءَ جست کنے اے منی جند ءِ سرزمین اِنت اے ھاک،کوہ ،درچک ءُ دار من ءَ پجّا کار اَنت من پرچا وتی پجار ءَ ترا بہ گُشاں ، ھمے زمین ءَ من تو وتی چم پچ کُتگ اَنت ،اے زمین ءَ منا ءُ ترا رودینتگ منا ءُ ترا یک پجارے داتگ، اے پجار منا ءُ ترا زندگ دارگی اِنت ، اے زمین درچک ءُ دار منا ءُ ترا گوانک جنگ ءَ اَنت کہ من ءَ چہ سانکلاں آزاد بہ کنے ۔ من اے گپ ءَ اے راستی ءَ شر سرپد آں کہ من یک سرپدیں بلوچے آں یک روچے منی جون ھم منی لوگ ءَ سوگات کنگ بیت۔
بِلّے من وشیں باندات ءَ نہ گِنداں ، بِلّے من آجوئی ءَ گوں وتی چمّاں نہ گنداں ، بَلے اے گپ ءِ سرا من ءَ یکین اِنت کہ اگاں من بہ باں یا مہ باں بَلے اے جھد بلوچ راج ءَ را وشیں بانداتے دات کنت، اے منی سِتک ایمان اِنت اگاں اے واب ءَ ما نہ گند ایں گڑا مئے آؤکیں پدریچ گند ایت، جھد ما اے واستہ کنگ ءَ اِیں کہ جھد پہ آؤکیں پدریچ ءَ کمے کمتر بہ بیت آ مارا اے شگان ءَ مہ جن اَنت کہ ما ھچ نہ کُتگ ۔
”بَلور کولواہ :بانک کریمہ ءِ چارمی سالروچ ءِ درگت ءَ سیمی پروگرام بلوچ وومن فورم ءِ سروک ڈاکٹر شلی بلوچ ءِ سروکی ءَ برجم دارگ بوتگ ءُ اے پروگرام ءِ تہ ءَ لس مھلوک ءَ مزنیں کساسے ءَ بھر زرت، یک کسانیں وھدے ءِ تہ ءَ ما کہ بلوچ مھلوک گوانک جتگ گڑا مھلوک ساڑی بوتگ اے لس مھلوک ءِ مھر اَنت گوں وتی رھشون ءُ گوں وتی زمین ءَ ، پروگرام ءِ بندات چہ راجی سوت ءَ بوتگ ءُ چہ آئی ءَ پد ڈاکٹر شلی بلوچ ،مھرک بلوچ ءُ ستار سمد تران کُت۔
شمے مھر ،ھمت،جوزگ مارا گام گام ءَ دیم ءَ جُنزگ ءِ سکین ءَ دینت، شمے کہ ھمراہ داری بیت ما دیم ءَ جُنز اِت کن ایں ،ھمے مھر اَنت کہ مارا گام گام ءَ کُربان بوگ ءِ سکین ءَ دے اَنت۔
کریمہ سرجم ءَ یک آشوبے ءِ اَت آئی ءِ تہ ءَ مارا زگریں آشوب گندگ ءَ اَتک، پرچاکہ آئی ءَ پہ وت نہ جیڑات پہ وتی زات ءَ نہ جیڑات بلکیں پہ بلوچ راج ءَ جیڑاِت، آئی وتی زند پہ بلوچ راج ءَ را ندر کت۔ مرچی مھر ءِ دروشم مٹ بوتگ ،مرچی سمو ءُ مست توکلی ، ھانی ءُ شے مرید ءِ مھر ءِ دروشم مٹ بوتگ اَنت ، مروچی شے پہ ھانی ءَ کربان نہ بنت ،مرچی شے پہ وتی سرزمین ءَ کُربان بنت۔
مئے ماتاں پہ مئے واستا شپ پاسی اے ھاترا ءَ نہ جتگ کہ ما لگور بہ بئیں ءُ پہ چار کلدار ءَ وتی جند ءِ سرڈگار ءِ گوما دلاری بہ کن ایں،مئے ماتاں مارا گوانزگ ءِ تہ ءَ لیلو داتگ کہ مزن بئے دلیریں بلوچے بہ بو وتی زمین ءِ پاسپان بو، لگور ءَ زند نیست آ ھر روچ مریت بلے ھما کہ بھادر ءُ دلیر داں ابد زندگ بنت۔
زمین ءِ مھر ءِ کساس چی بوت کنت کہ ما اے راستی ءَ سرپد ایں کہ اےراہ گچین کُتگ، اے راہ ءَ مرگ ءَ ابید ھچ نیست، ما چہ اے راستی ءَ چہ نابزانت ایں کہ زند یک برے رسیت ،گڑا مھر ءِ کساس چی بوت کنت کہ مات وتی چُکاں یل کن اَنت ءُ پہ زمین کُربان بنت ، زمین ءِ واستا لاڑکیں جنک کُربان بوگ ءَ اَنت، ھما زمین واستا بلوچ پُسگ کربان بوگ ءَ اَنت ۔
ڈنڈار کولواہ: بلوچ وومن فورم ءِ نیمگ ءَ چارمی ءُ گڈی لس مھلوک ءِ مُچی چہ ڈاکٹر شلی بلوچ ءِ سروکی ڈنڈار کولواہ ءَ برجم دارگ بوت ءُ اے مُچی ءِ تہ ءَ لس مھلوک ءَ مزنیں کچے ءَ بھر زرت ءُ اے مُچی سوبمند کُت ،مُچی ءِ بندات چہ راجی سوت ءَ بوت ءُ آئی ءَ پد ڈاکٹر شلی بلوچ ءَ تران کُت۔
ما کریمہ ءِ تھنا سیاسی سپر ءَ گوش مہ داریں بلکہ آئی ءِ پگر ءَ دیم ءَ بہ بریں۔
اے جھد پردی جھدے نہ اِنت ، اے جھد یک زاتی جدے ءِ نہ اِنت ، اے یک راجی جھدے اگاں اد ءِ نندوکیں مردم درست سرپد بہ باں کہ اے یک راجی جھدے او ایش مارا وتی کوپگاں زورگی اِنت ،گڑا من پہ ستک گوش آں کہ ما چو ایردست نہ بئیں ،پہ بلوچ ءَ منزل سک نزیک بیت اگاں اد ءِ نندوکیں مردم وتی زمہ واریاں بہ زاناں۔
من شمارا مروچی ادا نندوکیں کُلاں یک گپے سرپد کنگ لوٹ آں، ما کہ کتاباں وانیں راجی جنزاں وانیں تہ گِندیں کہ دنیا ءِ تہ ءَ ھما راجاں دیمروئی کتگ ھما راج سوبمند بیتگ اَنت کہ آیاں وتی ھق وتی وت واجھی ءِ ھاترا توار چست کتگ، گھگیری کتگ، مروچی ھما راج دنیا ءِ تہ ءَ وشھالیں زندے گوْازینگ ءَ اَنت، اگاں ما بلوچاں وتی پہ ھکانی واستا توار چست نہ کت یکجاہ نہ بیتیں، تہ ما مدام ھمے وڑا تھاروکیں زندے گوازینں ءُ مئے آؤکیں پدریچ ھم مئے بے تواری گُنگ بیگ ءِ سزا ءِ آس ءَ سُچ ایت گوں، پمشکا وتی واستا وتی زمین ءِ واستہ وتی باندات ءِ واستہ آواز چست بہ کن ایں، زلم ءِ دیم ءَ بوشتیں بے توار مہ بہ ایں اے تواری مارا گار کنت۔
بلوچ تھنا مرچی ٹارگٹ کنگ بوگ ءَ نہ اِنت بلکیں ھما زانت، ٹارگٹ کنگ بوگ ءَ اِنت مرچی ریاستی زندانانی تھا بلوچ وانندگیں سرانی مزنیں لڑے زندانیگ اِنت ،وانندگ یک راجے ءِ دیمروئی ءِ مانزمان بنت یک راجے ءَ شوکیں بانداتے دات کناں پمیشکہ گار ءُ بیگواھی ءِ تہ ءَ مزنیں لڑے وانندگیں سرانی اِنت۔
مئے شھیدانی رتکگیں ھون ، زندانی بیتگیں مردمانی درد ءُ اندوہ۔! اے کوہ ءُ کوچگ، درچک ءُ دار ءُ سُتکگیں ءُ پُر بیتگیں گِدان اے درست بلوچ ءِ لٹریچر اَنت۔