بلوچ یکجھتی کمیٹی ءُ تمپ ءِ جھمنندیں ظریف عمر ،بلیدہ گلی ءِ نوید ھمید ءِ کھول ءَ ھواریں دروشم ءَ شھید فدا چوک ءَ داں ڈپٹی کمشنر ءِ کارگس ءَ یک زھرشانی روانکے کش اتگ ءُ ڈپٹی کمشنر ءِ کارگس ءِ دیم ءَ نندانک داتگ-
گیشیں اھوالانی رد ءَ بلوچ یکجھتی کمیٹی ءَ ظریف عمر ءُ نوید ھمید ءِ کھول ءِ ھمراھی ءَ شھید فدا چوک ءَ ھستیں زھرشانی بنجل ءَ چہ یک روانکے کش اتگ چریشی ءَ زالبولاں ھوار مھلوک ءَ بازیں کچے ء بھر زرتگ-
زھرشانی روانہ شھید فدا چوک ءَ بنجاھی بازار ءُ پد ءَ ڈی پی او ءِ کارگس ءَ داں مزن شھدگ ءَ گشت کنان ءَ ظریف عمر ءُ نوید ھمید ءِ کھول ءَ انساپ ءِ لوٹ کنگ ءِ کڈنی کتگ-
کھول ءَ گوشتگ ظریف عمر ءِ کوشکارانی ھلاپ ءَ ایف آئی آر نبشتگ کنگ ءُ آ کانون ءِ تک ءَ سزا دیگ بہ بنت انت-
زھرشانی کنوکاں گوشتگ دانکہ مئے لوٹ منگ نہ بنت اِنت مئے لوٹانی سر ءَ دلگوش دیگی نہ بیت انت ھما وھد ءَ اے زھرشانی برجاہ بیت اِنت-
زانگ بہ ظریف عمر ءُ نوید ھمید ءُ کیچ ءِ جتا جتائیں جاھاں بیگواھیں مردمانی کھول گوستگیں سَے روچاں شھید فدا چوک ءُ نشتگ ءُ انساپ ءِ تلبگار انت زھرشانی نندانک ءَ بلوچ یکجھتی کمیٹی ءِ باسکاں ھوار جتا جتاجتائیں سیاسی ءُ چاگردی باسک ءُ وکیلانی برادری ءَ بھر زیرگ ءِ پلامرزی کتگ-