شال پریس کلب ءِ دیم ءَ زورانسری آوار جنی ءِ ھلاپ ءَ وائس فار بلوچ مسنگ پرسنز ءِ زھرشانی گدان ءَ مروچی پنچ ھزار ءَ شش سد ءُ ھشتاد ءَ دومی روچ ءَ ھم برجاہ بیتگ-
ھمے درگت ءَ بیگواھیں گل محمد مری ءِ کھول ءَ گْوشتگ کہ گل محمد مری ء غلام نبی ھمے ماہ ءِ بیست ءَ پاکستانی پوج ءَ چہ ھرنائی ءَ ھما وھد ءَ آوار جنگ ءَ پد بیگواہ کتگ وھدے آ جمعہ نماز ءَ ھرنائی شھر ءَ وانگ ءَ پد وتی میتگ ءَ روگ ءَ بیتگ-
عمران مری ءُ سفر خان مری کھول ءَ گل ءَ چہ شکایت کتگ کہ عمران مری ءِ محمد نور جھمنند مھلہ سنڑلی ھرنائی ءُ سفر خان ء محمد نور جھمنند مھلہ کوریاک ھرنائی پوج ءَ چہ دکی شھر ءَ ھمے سال ءِ سی نومبر ءَ زورانسری آوار جتگ ءُ بیگواہ کتگ-
شیر محمد مری ء محمد نور جھمنند مھلہ کوریاک چیریں ادارھانی کارمنداں پیر صاحب ایف سی چیک پوسٹ ھرنائی ءَ درکانودی آوار جنگ ءَ پد زورانسری بیگواہ کتگ-
آئی ءَ گْوشتگ کہ چاریں زورانسری بیگواھیں مردمانی کھولاں اے شکایت ھم کتگ کہ انتزامیہ آیاں آیانی دوستناکانی درگت ءَ ھچ وڑیں سرپدی دیگ ءَ نہ اِنت چریشی ءِ سوب ءَ آ سک سسّائی درد ءُ رنجانی تہ ءَ اَنت-
گل نیمگ ءَ چہ کھول ءَ را دلجمی دیگ بیتگ کہ گل محمد مری ،عمران مری ، سفر خان مری ءُ شیر محمد مری ءِ کیسز ھکومت ءُ بیگواھیں مردمانی درگت ءَ چہ جوڑ کنگ بیتگیں کمیشن ءَ دیگ بیتگ ءُ آئی ءِ پہ سلامتی یل کنائینگ ھاتر ءَ ھرچ وڑیں فورم ءَ توار چست کنگ بیت-
گل ءِ چیئرمین نصراللہ بلوچ ءَ ھکومت ءَ چہ لوٹ کتگ کہ گل محمد مری ، عمران مری ، سفر خان مری ءُ شیر محمد مری سر ءَ کجام وڑیں بھتامے ھست اِنت گُڑا آیاں دیم ءَ بیار اَنت آمیدگس ءَ پیش بہ کن اَنت اگاں بے میاراں گُڑا زوت یل بہ کن اَنت کھول ءَ درد ءُ رنجاں چہ در بہ کن اَنت-