بی ایل ایف ءَ سَے جتا جتائیں اُرشانی زمہ واری من اتگ انت

بلوچستان لبریشن فرنٹ ءَ دو جتاجتائیں شنگ کتگیں درشانی تہ ءَ دو ڈیتھ اسکواڈ کارمند ءُ پاکستانی پوج ءِ کارمندانی سر ءَ بیتگیں اُرشانی زمہ واری منّ اِتگ اَنت-

بی ایل ایف ءِ جارکش میجر گْوھرام ءَ گوشتگ کہ مئے سرمچاراں کیچ ءِ دمگ مند ءَ گوستگیں سرمچاراں ءُ ڈیتھ اسکواڈ کارمند مسلم ء نزیر ءُ پنجگور ءَ ریاستی ایجنٹ رزاق ء مولابخش کشتگ اَنت-

جارکش ءَ گْوشتگ کہ بیست چار دسمبر ءَ بیگاہ ءِ ھپت ءَ پنجگور ءِ دمگ سرادوک ءَ تیرگواری کتگ ریاستی ایجنٹ رزاق ء مولا بخش کشتگ – اے راجی میاربار گوستگیں سرمچاراں کلیم اللہ ء مستری محمد جان ءِ سروکی ءَ کار کنگ ءَ بیتگ ءُ کوھی دمگاں جھمنندی ءِ سوب ءَ روگ ءُ آیگی راھانی سرپدی بیتگ ئِے-

جارکش ءَ گْوشتگ کہ دوھزار پانزدہ ءَ پنجگور ءِ دمگ سمنج ءَ اکرام ءُ دوھزار بیست یک ءَ بی ایل ایف ءِ سرمچاراں شھید ناصر پنّام ءِ صوفی ءُ شھید عادل پنّام ءِ کمبر شھید کنائینگ ءَ پوج ءَ را سرجمی ءَ کمکاری کتگ-

جارکش ءَ گْوشتگ کہ گل ءَ اشی ءِ پت ءُ برات میاربار ءِ سرجمیں کارپداں چہ سرپدی داتگ اشی ءَ اَبید ھم آ سرپد نہ بیتگ- گل ءَ میاربار ءِ دومی سنگتانی سرجمی ءَ یکجاہ کتگ اَنت آیاں زوت ھم میارباری ءِ سزا دیگ بیت-

جارکش ءَ گْوشتگ اُرش ءَ سرمچاراں بیست شش دسمبر دوھزار بیست چار ءَ کیچ ءِ دمگ مند، کھنک ءَ تیرگواری کتگ سرکاری پلامرزی دمگی ڈیتھ اسکواڈ ءِ کارمند ءُ گوستگیں سرمچاراں مسلم ء نزیر کشتگ-

جارکش ءَ گْوشتگ کہ مسلم ء نزیر جھمنند کھنک مند ءَ دوھزار نوزدہ ءَ پاکستانی پوج ءِ دیم ءَ سلاہ چگل داتگ اَنت، پاکستانی پوج ءِ دیم ءَ سلاھانی چگل دیگ ءَ پد بے تواری جاہ ءَ سربازار ءَ پاکستانی پوج ءِ گوم ءَ ھوار بیتگ ءُ بلوچ پُسگانی شھیدی ءُ زورانسری آوار جنی ءَ ھوار چاگردی سلکیاریاں ءَ تچکی ءَ ھوار بیتگ-

جارکش ءَ گْوشتگ کہ گوستگیں سرمچاراں مسلم ء نزیر مند جتاجتائیں دمگاں زورگریں پاکستانی پوج ءِ واستا کار کنگ ءَ بیتگ ءُ اے دمگاں دُژمنیں پوج سر بازار اے ٹولی ءَ را بلوچ جُھدکارانی ھلاپ ءَ سلاہ بند بیتگ ءُ آ تاوان دیگ ءَ اَبید چاگردی سلکّاریاں ھوار دُزی، ڈنگی ءُ بے میاریں پُسگاں زور تاکت ٹیکس ءَ پچگرگ ءَ بے لگام کتگ اَنت-

جارکش ءَ گْوشتگ کہ سرمچاراں اشی ءِ موباھل ءُ دگہ سامان وتی دستیگ کتگ اَنت، آئی ءِ کُمک ءَ چہ اشی ءِ ھمراھی ءَ کار کنوکیں ڈیتھ اسکواڈ کارمندانی نام ءُ جاگہ دزکپتگ اَنت، اے ٹولی ءِ پاکستان ءِ دیم ءَ سلاہ چگل دیوکاں اَبید دگرانی نام ھم دیم ءَ اَتکگ اَنت- اشانی درگت ءَ پارٹی ءِ اینٹلیجنس ٹولی کار کنگ ءَ بیتگ- زوت آیانی کارپدانی جُست ءَ کن ایں-

جارکش ءَ گْوشتگ بی ایل ایف دوئیں ریاستی کارمندانی کوش زمہ واری ءَ منّ اِیت ءُ سرجمیں ڈیتھ اسکواڈ کارمند ءُ چاریگاں کڈن کن ایں کہ آ وتی کاراں چہ بہ سُدر اَنت اگاں ناں آسر راجی دروھیانی وڑ ءَ بنت-

جارکش ءَ راج ءَ چہ ھم دزبندی کتگ کہ آ کوھی دمگاں شکار ءُ پکنک واستا آیگ ءَ پھریز بہ کن اَنت پرچاکہ ریاست وتی چاریگاں لَس مھلوک ءِ دروشم ءَ راہ دے اَنت سرمچارانی چاریگی کن اَنت- ھمے ھاتر ءَ کوھی دمگاں آیگ ءَ پھریز بہ کن اَنت دگہ وتی جان ءُ مال ءِ زمہ وار وت بنت-

جارکش ءَ دگہ یک درشانے ءِ تہ ءَ گوشتگ سرمچاراں بیست شش دسمبر ءَ پشمبے ءِ شپ ءَ نُھ نیم ءَ کیچ ءِ دمگ تمپ ءَ گریڈ اسٹیشن ءَ برجاھیں زورگریں پاکستانی پوجی چوکی راکٹ لانچر ءُ مزنیں سلاھاں چہ نشانگ کتگ دُژمنیں پوج ءَ تُرندیں جانی ءُ مالی تاوان رس اِتگ-

جارکش ءَ گْوشتگ راکٹ گولہ چوکی ءِ تہ ءَ کپتگ چریشی ءَ چہ چوکی ءِ تہ ءَ آس چست بیتگ چریشی ءَ چہ زورگریں پوج ءِ تمبو ءُ گاڑی ءَ آس کپتگ-

جارکش ءَ گوشتگ اُرش ءَ پد پروش وارتگیں زورگریں پوج ءَ دمگ بند کتگ مردم دلسیاہ کتگ اَنت، وھدے کہ لوگانی سر ءَ بیڑ ھم برتگ، ھمے میان ءَ زورگریں پوج ءَ ظریف ء اومر آوار جنگ ءَ پد وتی ھمراھی ءَ برتگ اود ءَ آ لَٹ کُٹانی نشانگ کتگ ءُ شھید کتگ اَنت-

جارکش ءَ گوشتگ پوج مدامی وڑ ءَ سرمچاراں تُرندیں اُرشاں پد لَس شھریاں نشانگ کنت دانکہ بلوچ راج ءَ را سرمچارانی پلامرزی ءَ چہ داشت بہ کنت-

جارکش ءَ گْوشتگ اُرش ءَ پد سرمچار پہ سلامتی مُھریں جاھاں سر بیتگ اَنت-

جارکش ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت ءُ زورگریں پاکستانی پوج ءِ دراھگ ءَ تاں اُرش ءَ برجاہ دار اِیت-