میان استمانی ادارہ پاکستان سر ءَ زور بدنت کہ راشد حسین ءَ ھوار سرجمیں بیگواھیِں مردمانی یل کنائینگ ھاتر ءَ گامگیج بزور اِیت- فریدہ بلوچ

زورانسری بیگواھیں راشد حسین بلوچ ءِ گْھار فریدہ بلوچ ءَ وتی برات ءِ زورانسری آوار جنی ءِ شش سال سرجم بیگ ءَ وتی ھیال لیکہ درشان کنان ءَ گوشتگ کہ منی برات راشد حسین دوھزار ھژدہ ءَ چہ متھدہ ارب امارات ءَ آوار جتگ بید کانودی کاروائی ءَ پاکستان ءَ برتگ – شش سال ءَ گوستگ، بلے مارا تنی وھدے ھچ وڑیں ھال دز نہ کپتگ- اے سالاں مئے کھول سک درد ءُ گم ءُ دلسیاھی دیمپان اِنت، بلے ما پُشت نہ کنز ایں ءُ وتی جُھد برجاہ بنت-

فریدہ بلوچ ءَ گْوشتگ کہ آیاں وتی برات ءِ یل کنائینگ ھاتر ءَ میان استمانی ھساب ءَ توار چست بہ کن اِت- ما اکوام متھدہ ءِ زورانسری آوار جنی ٹولی. ایمنسٹی انٹرنیشنل ءُ دگہ انسانی ھکانی ادارھاں چہ اِھوال کتگ، ءُ اے جیڑہ میان استمانی فورمز سر ءَ چست بہ کن اِت- جتاجتائیں سیاسی راھشون ءُ کارکناں مئے پلامرزی کتگ، بلے پاکستان ءِ واکدار ءَ مارا تاں انگت ھچ وڑیں پسّہ نداتگ-

آیاں دیمتر ءَ گْوشتگ کہ اے تھنا منی برات جیڑہ نہ اِنت- بلوچستان ءَ ھزرانی اے وڑیں ءُ گماں گوزگ ءَ اِنت، اود ءَ آیانی دوستناک بیگواہ اَنت ءُ آیانی کیساں ڈالچاری کنگ ءَ اَنت- مارا انساپ نہ رسگ ءَ اِنت ءُ اشی ءِ سر ءَ بے تواری کنگ گیش زُلم اِنت-

پاکستان ءِ آمیدگس ءُ کانودی نزام سر ءَ ایرجنی کنان ءَ فریدہ بلوچ ءَ گْوشتگ کہ ما سندھ ھائی کورٹ، بلوچستان ھائی کورٹ، ءُ اسلام آباد ہائی کورٹ ءَ ارزبندی داتگ، بلے اے ادارھاں مارا دلپروش کتگ- پاکستان نزام تھنا توانمنداں واستا جوڑ کتگ اَنت، ءُ مارا وتی ھک لوٹگ ءِ سزا دیگ بیگ ءَ اِنت-

آیانی گوشگ اِنت کہ اے جُھد تھنا وتی برات واستا اناں، بلکیں بلوچستان ءِ سرجمیں بیگواھیں مردمانی واستا اِنت، مئے توار تھنا یک گھارے ءِ نہ اِنت، بلکیں سرجمیں ھما کھولانی توار اِنت کہ وتی دوستناکانی واستا انساپ شوھاز ءَ اِنت- ما اے وھد ءَ تاں آرامی ءَ نہ نند ایں دانکہ انساپ نہ رس اِیت-