ھوشاپ: زورانسری بیگواھی ءِ ھلاپ ءَ زھرشانی برجاہ، سی پیک شھدگ ءَ نندانک

بلوچستان ءِ دمگ کیچ ھوشاپ ءَ زمان جان ءُ ابولھسن ءِ کھول ءِ نیمگ ءَ دومی روچ ءَ ھم زھرشانی نندانک برجاہ اِنت- مروچی یک زھرشانی روانکے ھوشاپ ءِ بازار ءَ بندات بیتگ ءُ ھوشاپ زیروپوائنٹ ءَ آسر بیتگ- اود ءَ زھرشانی کنوکاں پوج ءِ دست ءُ گرگ بیتگیں وتی مردمانی یل کنگ ءِ لوٹ کتگ-

زھرشانی ءَ کھول ءُ شھریانی بازیں کچے ھوار بیتگ – آیاں بھتام جتگ کہ زمان جان ءُ ابولھسن ڈسٹرکٹ کونسل چیئرمین ھوتمان ریپنتگ ءُ وتی گور ءَ لوٹارینتگ انت ءُ کاؤنٹر ٹیررزم ڈپارٹمنٹ ءِ دست ءَ داتگ انت چریشی ءَ پد ھردوکیں ورناہ یل نہ بیتگ اَنت-

کھول ءِ رد ءَ آیانی بیگواہ بیتگیں مردماں مروچی نھمی روچ اِنت کہ گار انت ما اوپار ءَ دمبرتگ بلے نی بے تواری نہ بیت اِنت اگاں مئے مردم یل کنگ نہ بیت انت ما وتی زھرشانی ءَ برجاہ داریں-

دومی نیمگ ءُ زھرشانی ءِ سبب ءَ ھوشاپ زیروپوائنٹ ءَ سی پیک دگ ءِ بندش ءِ سبب ءَ روانی مھتل انت کھول ءَ کڈن کتگ کہ آ ھما وھد ءَ زھرشانی ءَ ھلاس نہ کن اَنت دانکہ آیانی مردم واتر نہ بنت اِنت-

کھول ءَ واکداراں دزبندی کتگ کہ سرجمی ءَ دیم ءَ بیا اَنت ءُ آیانی مردمانی یل کنائینگ ءَ ستکداری بہ کن اَنت ءُ اگاں ناں وتی زرمبشت ءَ گیشتر ترند کن اَنت-