شال : جنرل اسلم بلوچ ءِ شھیدی ءِ سال روچ ءِ درگت ءَ سرجمیں بلوچستان ءَ پوج شیوار کنگ بیتگ

بلوچ لبریشن آرمی ءِ گوستگیں سروک جنرل اسلم بلوچ ءُ آئی ءِ سنگتانی شھیدی ءِ سال روچ ءِ درگت ءَ پھازی جاوراں چاران ءَ بلوچستان ءِ جتاجتائیں دمگاں پوج شیوار کنگ بیتگ –

چہ شال ءَ پشاور ءَ رؤکیں جعفر ایکسپریس ءِ ریل واکداراں پھازوکی ءِ سوب ءَ مھتل کتگ-

ریل ءِ تک ءَ شنگ کتگیں درشان ءِ رِد ءَ پھازوکی سوب ءَ مروچی شال ءَ چہ پشاور ءَ رؤکیں ایکسپریس ریل مھتل کنگ بیتگ ءُ وھدے کہ چمن پسنجر ریل وتی وھد ءَ شال چہ چمن ءَ جُنز اِتگ-

ریل ءِ واکدارانی رِد ءَ مھتل بیتگیں ریل ءِ مساپراں سرجمی ءَ ھیالدارگ بیگ ءَ انت-

ھمے وڑ نوشکی ءَ پھازوکی تُرس ءَ چاران احمد وال ءُ کش ءُ گوراں انٹرنیٹ سروس بند کنگ بیتگ ءُ وھدے کہ لسبیلہ، ھُزدار ءُ مکران ءَ لشکریانی سُر ءُ پُرانی تہ ءَ گیشی گندگ اَتکگ-

زانگ بہ بیت کہ باندا بلوچ لبریشن آرمی ءِ گوستگیں سروک جنرل اسلم بلوچ ءُ آئی ءِ سنگتانی شھیدی سال روچ انت –

دوھزار ءُ ھژدہ ءَ بلوچ راھشون جنرل اسلم بلوچ ءُ آئی ءِ سنگت کماندار کریم ( سگار )، فدائی بابر مجید پنّام ءِ فرید، اختر بلوچ پنّام ءِ سردارو ءُ امان اللہ پنّام ءِ صادق یک وتکش تراک اُرشے ءَ نشانگ کنگ بیتگ اِت اَنت ءُ آ نمیران بیتگ اَنت-

دوھزار ءُ بیست ءُ دو ءَ بلوچ لبریشن آرمی ءَ اے روچ ءِ درگت ءَ سرجمیں بلوچستان ءَ مزنیں کچے ءَ اُرش کتگ ات اَنے آیانی تہ ءَ پاکستان پوج ءِ آپیسراں ھوار بازیں کارمندے کشگ بیتگ ات اَنت-

ھمے سال ءَ بلوچ لبریشن آرمی ءَ نواب اکبر خان بگٹی ءِ شھیدی ءِ روچ ءِ درگت ءَ سرجمیں بلوچستان ءَ ” آپریشن ھیروف ” ءِ نام ءَ مزنیں کچے ءَ کاروائی کتگ اَت چریشی ءَ لسبیلہ ءَ پاکستان پوج ءِ ھیڈکواٹر ءِ سر ءَ فدائی اُرش ءُ دستیگ ھوار ات-