بلوچستان ءِ دمگ کیچ ءَ بیگواہ بیتگیں دو ورنایانی کھولاں زھرشانی کنان ءَ شاپک ءِ ھند ءَ سی پیک ایم ایٹ شھدگ بند کتگ-
اھوالانی رد ءَ کیچ بالگتر ءِ جھمنندیِ زمان ءُ ابولھسن ءِ کھولاں سَے شمبے ءِ روچ ءَ آیانی بیگواھی ءِ ھلاپ ءَ شاپک ءِ ھند ءَ سی پیک دگ بند کتگ-
دگ ءِ سر ءَ کھول ءَ زھرشانی نندانک داتگ ءُ دگ بند کتگ ءُ زھرشانی نندانک ءَ زھگ ءُ زالبول بازیں کچے ءَ ھوار اَنت-
زھرشانی ءِ سبب ءَ ھردوکیں نیمگاں روکیں گاڑی مھتل انت ءُ چریشی ءَ بازیں کچے ءَ مال برداریں گاڑی ھم مھتل انت-
زانگ بہ بیت لھتے روچ پیش زمان، التاپ ءُ ابولھسن چہ تربت ءَ بیگواہ کنگ بیتگ انت کہ کھول ءَ پریس کانفرنس کنان ءَ بھتام جتگ ءُ گوشتگ مئے ورنا ڈسٹرکٹ ءِ چیئرمین ھوتمان ءَ گپتگ ءُ ادارھانی دست ءَ داتگ انت ءُ پد ءَ بیگواہ انت کھول ءَ داں سَے شمبے ءَ انتزامیہ ءَ را مھلت داتگ بیتگ بلے ایشانی توک ءَ التاپ یل بیتگ ءُ زمان ءُ ابولھسن انگت بیگواہ اَنت-