بلوچ اسٹوڈنٹس ایکشن کمیٹی ءِ نیمگ ءَ چہ نوکیں سال ءِ بندات ءَ بلوچستان ءِ جتاجتائیں ھند ءُ دمگاں “بلوچستان کتاب کاروان” ءِ نام ءَ کتاب میڑہ برجم دارگ بنت انت۔ اے کتاب میڑہ پہ بلوچ نودربراں نوکیں سال ءِ ٹیکی اَنت کہ آیاں بلوچستان کتاب کاروان ءِ وسیلہ ءَ ھما کتاب دست کپ اَنت کہ انگت مارکیٹ ءَ چو ارزانی ءَ دز نہ کپ اَنت۔چہ گل ءِ نیمگ ءَ پہ بلوچ نودربراں نوک نوکیں لٹریچر چاپ کنگ بیتگ اَنت ءُ جتاجتائیں پبلی کیشنزاں چہ گچینی ئیں کتاب زُرتگ ءُ یکجاہ کتگ اَنت کہ آ گل ءِ اسٹالاں دست کپ اَنت۔
بلوچستان کتاب کاروان گل ءِ مستریں مراگشانی بھرے ءُ آئی ءِ مول ءُ مراد بلوچستان ءَ کتاب دود ءِ دیمروی ءُ پہ بلوچ نودربراں وھد ءِ لوٹ ءِ ھساب ءَ لبزانک ءِ سر کنگ اِنت۔ چوشکہ ٹیکنالوجی گیش دیم ءَ روان اِنت ءُ اش چِست ءُ ایراں بلوچ ورنا انچش مان گشینتگ اَنت کہ آ میزان میزان ءَ چہ کتاباں دور بیگ ءَ اَنت یا انچیں کتاب وانگ ءَ اَنت کہ آیاں گوں بلوچ ءِ جیڑہ ءَ ھچ سیادی نیست انت۔
اے کتاب میڑہ ءِ مستریں مول ءُ مراد ھمیش اَنت کہ بلوچ ءِ ورنا وت ءَ گوں کتاباں نزیک بہ کن انت ءُ کتاب وانگ ءِ ارزشت ءُ زلورت ءَ پوہ بہ بیت۔ نودربر کتاب وانگ ءِ کرد ءَ سرپد بہ بنت پرچاکہ اے ھما کار یا کرد اِنت کہ مارا وت بیسھی ءُ دورچاری ءَ ھوار مئے ھمک جیڑہ ءِ سائنسی ءُ تھیوریٹیکل بُنیاد ءُ گیش ءُ گیواری ءَ کُمک کن انت۔ بلوچ ورنا کتاب وانگ ءَ وتی ھمک روچی زند ءِ بھر جوڑ بہ کن اَنت، روچے کم چہ کم سے یا چار کلاک کتابجاھاں جنرل کتاب وانگ ءَ بہ گوازین اَنت ءُ ھما کتاب ءَ بوان اَنت کہ آ بلوچ ءِ وشھالیں باندات ءُ بلوچ جیڑہ ءِ توجیل ءَ آھانی راھشونی ءَ کُت بہ کن انت۔