بلوچستان ءِ تیابدپی شھر گوادر ءَ آل پارٹیز الائنس ءِ باسک ءُ پلامرزی کنوکاں میرین ڈرائیو ءَ مروچی ھشتمی روچ ءَ زھرشانی نندانک برجاہ اِنت چریشی ءِ سبب ءَ گوادر ءَ زند ءِ ھمک روچی داب آسرمند بیتگ اَنت – زھرشانی کنوک تیل ءُ دگہ واپار ءِ واستا ایران ءَ ھوریں سیمسر ءِ پچ کنگ ءِ لوٹ ءَ کنگ ءَ اَنت کہ چہ بازیں ماھاں پاکستان ءَ بند کتگ-
زھرشانی ءَ ھواریں رھشوناں کنٹانی ھوت سیمسر ءَ ٹوکن ءِ دیم ءَ آرگ ءِ سر ءَ ایراد گپتگ ءُ اے کار ءُ بار ءِ راہ ءِ سر ءَ ٹوھیں ڈنگرے گوشتگ – آیاں گوشتگ اے گامگیج دمگ ءَ بے روزگاری گیش بیت اِنت-
زھرشانی کنوکاں ٹوکن سسٹم ءِ ھلاس کنگ ءُ سیمسر ءِ پچ کنگ ءِ لوٹ کتگ-
زھرشانی کنوکاں گوادر ءِ بنکی آسراتی ءِ سر ءَ چمشانک دیان ءَ گوشتگ کہ دمگ ءَ بجلی ءُ ورگی آپ ءِ نہ بوگ دمگی مردمانی گون ءَ سنگینے ناانساپی یے-
زھرشانی کنوکاں گوشتگ تلار چیک پوسٹ ءَ دمگی جھمنندانی تیل ءِ واپار کنوکیں گاڑی داشتگ انت چریشی ءِ سبب ءَ آ بازیں ھپتگاں مھتل اَنت-
آیاں گوشتگ اے دابیں بندشانی سبب ءَ دمگ ءِ زَرکاری ءُ چاگردی جاور ناگیگ تِر بوان اَنت ءُ چریشی ءِ سبب ءَ بازیں مردماں ترندیں مشکلانی دیمپانی اِنت-