علی حسن ءِ یات
نبشتہ کار: ندیم اِلٰی
دی بلوچستان پوسٹ
بھشت ءَ بات ئے منی پُل تئی روگ ءَ من ءَ باز تَور اِت، تئی روگ ءَ تِیوگیں میتگ ویران بوت۔ تئی گپ مُدام من ءَ گیر کاینت تو ھر وھد ءَ نشت ءُ مزاک کُتگ، تئی کندگ من ءَ ھر روچ گِیر کاینت۔ منی دست نہ رس ایت من پہ تو چے بہ آں، بوت کنت ھمے وڑ تئی کسمت ءَ لِک اِتگ شمّن دور روگ ئے۔ من ءَ یات ءُ زھیر باز کاینت بلے چے کن آں کے ءَ گوں گلا بہ آں من زان ءَ تو نوں ھچبر پمّن واتر نہ بئے، من مُدام گوں پاکیں ھُدا وندا دوا کن آں تئی جاگھ ءَ آسودگ بہ کنت۔
تئی ھما دوستیں سنگت مروچی ترا سک یات کار اَنت ھمایانی چمّانی ارس رچ اَنت۔ تئی مات ءُ پت مُدام تئی نام ءَ گِر اَنت اِلی ھسن اِلی ھسن کن اَنت چیاکہ تو آھانی راستیں چم بوتگ ئے۔ یک روچے تو من ءَ پہ کندگ گْوشت برو اڑے منی ھما مردم ءَ بگوش بْیا بلے من تئی گپاناں نا نہ کُرت من شُت آں۔ من نزانت تو مارا چو زُوت یل کن ئے ءُ روئے، تئی مات ھما کمبائے کرّا روت تئی نام ءَ گیت اِیں ترا یات کنت آئی ءِ چمّانی ارس چو ھَوری ءَ رِچ اَنت۔ آ مُدام ھُدا ءَ را جُست کنت، ھے ﷲ تو منی تاسُکیں بچ شمّن چیا جُدا کُت گوں کسانیں سر ءَ بزّگیں مات مُدام ھنچو کنت۔ تئی روگ ءَ پد تیوگیں بابلی ءِ مردم گمیگ اَنت تئی دوستیں سنگت اِلی ھیدر ءُ واھد مدام تئی کندگ ءُ مزاکاں دل ءَ کار اَنت، ھمایانی ارس رچ اَنت۔
اِلی ھسن تئی روگ ءَ پد تئی تیوگیں گِس ءِ مردم مُلور اَنت ھر وھد ءَ تئی نام ءَ گِر اَنت ءُ گِریو انت۔ تو چیا اشتاپی کُرت مئے دل ءِ توک ءَ داگے اِیر کُرت ءُ شُت ئے، ما نہ زان انت کہ تو چو اشتاپی کن ئے تو گوں وتی سالوکیں سر ءَ زُوت زمین ءِ میار بئے۔ تئی مات ءُ پت ءِ دل ءَ سبر اُپار ءَ بہ دنت ءُ ترا ﷲ بھشت ءَ بہ کنت۔
تو ھر وھدا کندگ ءُ مزاک کُتگ اَت تئی کندگ ءُ مزاک من ءَ ھچبر دل ءَ نہ رو اَنت۔ تئی دپ ءَ ھر وھد ھمے گپ اَت کہ حبیب ءِ آروس ءَ ڈھل ءُ چاپ دار اَنت من ءَ انگت ھمے گپ یات اِنت ارواہ ما نہ زانت تو اِے وڑا مارا یل ءَ کن ئے ۔ منی پُل اللہ پاک ترا باگیں بھشت ءَ پہ کنت تئی گْھار ءُ بْراتانی دل ءَ اللہ سَبر بہ دنت تئی جاگہ ءَ آسودگ بہ کنات ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-