تربت : واحد کمبر بلوچ ءِ یل نہ کنگ ءِ ھلاپ ءَ زھرشانی

تربت روانک ءَ مزنیں کچے ءَ شھری ءُ بیگواھیں مردمانی کھولاں بھر زرتگ ءُ گْوشتگ بیگواھیں مردم یل کنگ بہ بنت اِنت-

بلوچستان ءِ دمگ کیچ ءِ بُنجاھی شھر تربت ءَ مروچی یک زھرشانی روانکے کشگ بیتگ، چریشی ءَ زالبول، زھگ ءُ ورنایاں مزنیں کچے ءَ بھر زرتگ، روانک ءِ مول ءُ مراد کماشیں بلوچ آجوئی لوٹوکیں رھشون استاد واحد کمبر بلوچ ءِ یل نہ کنگ، آمیدگس ءَ پیش نہ کنگ، ءُ انساپ ءِ نہ دیگ ءِ ھلاپ ءَ آئی ءِ کھول ءِ نیمگ ءَ زھرشانی نکش کنائینگ بیتگ-

روانک ءَ تربت ءِ دمگی شھریاں، بیگواھیں مردمانی کھول، واحد کمبر ءِ کھول ءُ سیاسی گلانی راھشون ءُ باسکاں بھر زرتگ – زھرشانی کنوکاں واحد کمبر ءَ ھوار دگہ بیگواھیں مردمانی اکس چست کتگ بیتگ اَنت ءُ زورانسری آوار جنی ھلاپ ءَ ناراہ جتگ-

واحد کمبر کہ بلوچ آجوئی زرمبشت ءِ یک پرکار ءُ شرپدار ایں مردمے بستار ءَ زانگ بیت، نوزدہ جولائی ءَ ایران ءِ دمگ چہ کرمان ءَ آوار جنگ بیتگ – آئی ءِ کھول ءُ بلوچ آجوئی لوٹوکیں گلاں بھتام جتگ کہ آ پاکستانی انٹلیجنس کمک ءَ آوار جنگ ءُ پاکستان ءَ برگ ءُ نو آ پاکستانی پوج دست ءَ اِنت-

تربت روانک ءِ میان ءَ واحد کمبر جنک، مھلب کمبر بلوچ ءَ تران کنان ءَ گْوشتگ کہ منی پت بلوچ سیاسی جُھد ءِ بھر بیتگ ءُ مدام بلوچ ھکانی گپے کتگ- پاکستان ءَ آ آوار جتگ درکانودی ھساب ءَ بند کتگ-

آیاں گوشتگ ما لوٹ کن ایں کہ آئی ءَ دیم ءَ بیار اِت ءُ انساپ دیگ ءِ موہ دیگ بہ بیت اِنت-

مھلب کمبر ءَ انسانی ھکانی گلاں، ھاسکار ریڈ کراس، چہ دزبندی کتگ آ اے درگت ءَ دزمانجنی بہ کن انت ءُ واحد کمبر ءَ سیاسی بندیگی ءِ ھساب ءَ پھاز بہ دے اَنت-

اے درگت ءَ زھرشانی ءَ ھواریں مردماں زورانسری آوار جنی آوار جنی ءِ ھلاس کنگ ءُ واحد کمبر ءِ زوت یل کنگ ءِ لوٹ کتگ آیانی گوشگ اِنت کہ ریاست ءِ نیمگ ءَ چہ زوراکی ءُ زورانسری ءَ آجوئی لوٹوکیں مردم بے توار کنگ ءِ جُھد ءِ جاوراں گیش ھراب کنگ ءَ اِنت-

روانک ءَ ساڑی ئیں بیگواھیں مردمانی کھولانی ھم وتی دوستناکیں مردمانی یل کنگ ءِ لوٹ کتگ ءُ بھتام جتگ آمیدگس ءُ کمیشنر ءِ سر ءَ انساپ دیگ وتی جاہ ءَ ریاستی درشان ءَ مھکم کنگ ءَ اَنت-

روانک ءِ میان ءَ ترانکاراں گوشتگ کہ بلوچستان ءَ برجاھیں زرمبشت ءِ ھاتر ءَ ریاست ءِ پالسیانی جیڑہ ءَ گیش ریاستی زوراکی ءِ سبب ءَ مردماں سلاہ بندیں گلاں نیمگ ءَ دلگوش گور کنگ ءَ اَنت، چریشی ءَ چہ سیمسر ءَ گیش بی ایمنی ودی بیگ ءَ اِنت-

روانک ءَ زھرشانی کنوکاں گُڈی ءَ واحد کمبر ءَ ھوار دگہ بلوچ سیاسی ءُ درسیاسی زورانسری آوار جنی ءِ آماچیں مردمانی دیم ءَ آرگ ءُ زوت یل کنگ ءِ لوٹ کتگ-