من ءُ من ھستناکی
نبشتہ کار: سوپیہ بلوچ
دی بلوچستان پوسٹ
من وتی کوٹی ءِ تہ ءَ تھنا نشتگ اِت آں۔ من وتی ھستی ءِ گرانی ءَ گوں جنگ ءَ اِت آں۔ منی کش ءُ کِر ءَ ھاموشی اَت ، انچش سما بوگ ءَ اَت کہ اے ھاموشی ءِ جُھل ءَ من روان آں ۔ من اے درُستیں مارشتاں سرپد بوگ ءِ جُھد ءَ اِت آں، انچشُ نشتگ اِت آں کہ ”سیمون دی بووا“ ءِ گُشتگیں لبز من ءَ یات اتک اَنت ،اے خلا ءِ بُنجاہ ءِ تہ ءَ ھما بے چاڑی ھست کہ مئے زند مئے وتی اَنت۔ ءُ پد ءَ ھم بے متلب اَنت، اے آزاتی ءِ بے چاڑی یک انچوشیں دنیا ءَ کہ دنیا ءِ تہ ءَ ھچ رھبند نیست۔
”سیمون دی بووا“ ءِ لبز منی گوشاں توار ءَ اِت اَنت ۔ انچشُ سما بیت کہ اے لبر منی نااُمیتی ءَ بیان کنگ ءَ اَنت، اے ھبر منّگی اَنت کہ اے زندگی ءَ ھچ متلب نیست۔ اے یک ھلاس نہ بوھوکیں ابیتکی اَنت۔ وتی ھیالانی درشان کنگ ءَ ھم یک وشی ءُ ھذابی اَنت۔
من مدام ھمے آزاتی ءِ تہ ءَ وت ءَ بے چاڑ سما کناں ۔ من ءَ سما بیت کہ منی چپ ءُ چاگرد منی ابیتکی ءَ گیش کنان اَنت۔ ھر پیسلہ منی نااُمیتی ءَ ابید دگہ ھچ جاہ سر نہ کنت۔ ھر وھد من ءَ سما بیت کہ من یک بے کار ءُ بے وسی ءِ تہ ءَ اوشتاتگ آں ءُ پیسلہ شر کنگ ءِ جُھد من ءَ وتی اندر ءَ مانگشّینگ ءَ اَنت۔ من ءَ بے باوری ءِ دریا ءِ چولانی تہ ءَ گار کنان اِت آں۔انگت اوں وتی بے وسی ، ایوکی، ابیتکی ءِ ابید ھم من اے ھبر ءَ منّگ ءَ گوں یک تسلی ءِ رس اِیت ۔ ھمے ھالیگی ءَ منّگ ھمے تھنائی ءُ درآمدی ءَ وتی امباز ءَ زورگ ، من ءَ منی تُرس ءَ گوں دیم پہ دیم کنگ ءِ ھمت دنت ۔ اے درد ، اے ایوکی ، اے ابیتکی من ءَ زندگی ءِ اسل درُوشم ءَ پیشدار اِیت ھما دروشم یک راستے۔
من ءَ سما بیت کہ زندگی ھمش اِنت ءُ یک متلبے نیست۔ بلکیں متلب دایگی اِنت۔ وت جوڑ کنگی اِنت۔ اے مارشت من ءَ توانگر کنت۔ چہ ھر تُرس ءَ من ءَ سما بیت کہ منی کار ءُ منی گچینی منی زندگی ءَ متلب ءُ مکسدے دات کنت۔
ھدا من ءَ دگہ منی گماں منی ھستی ءِ لھتیں ترندیں راستیاں کہ من ءَ گوں ھوار اَنت۔ ءُ منی گماں سپر کناں اَنت۔ اے یک ترندیں راہ اَنت بلے من ءَ ھبر ءِ سر ءَ سِتک اِنت کہ من تھنا نہ آں کہ اے وڑ سما کناں ، بلکیں من ءَ چہ پیسر مزنیں مردم بوتگ اَنت کہ اے راہ ءَ وتی ھیال ءُ لیکھاں درشان کتگ اَنت۔ انچش کہ سارتر ءُ سیمون دی بووا ، واجہ آئیڈیگر ، کہ ما آئی ءَ وجودیت ءِ واجہ گُشیں۔
اے زندگی یک پسو یے ءِ درگیجگ یا ھُدا ءِ داتگیں متلب ءَ درگیجگ ءِ واست ءَ نہ اَنت۔ بلکیں وتی راہ ءَ وت درگیجگ ءِ واست ءَ زندگی۔ اے زندگی ءِ درست ترندی ، ابیتکی ، بے وسی ءُ ڈولداری ءِ گماں زندگی ءَ امباز کنگ ءُ وتی وڑ ءَ مانا دیگ ءِ نام اِنت۔اے منی زندگی اِنت۔ منی آزاتی اِنت۔ ءُ اے زندگی ءِ گماں اتکگ ابیتکی ءُ بے وسی ، بے چاڑی اوں منی آں، تھنا منی۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت